«Viarnicie mnie maju rodnuju movu»: u Breście aburylisia ruskamoŭnymi tabło ŭ tralejbusach
Žychary Bresta zaŭvažyli, što na elektronnych tabło ŭ tralejbusach nadpisy źjaŭlajucca tolki pa-rasiejsku. Heta vyklikała abureńnie ŭ ludziej.
Žychary Bresta źviarnuli ŭvahu na moŭnaje afarmleńnie elektronnych tabło ŭ tralejbusach, dzie na niekatorych maršrutach nadpisy adlustroŭvajucca tolki pa-rasiejsku. Nahodaj dla abmierkavańnia stała videa ŭ TikTok, piša BGmedia.
Pad videa, apublikavanym žycharom Bresta, karystalniki pačali vykazvać niezadavolenaść i pytacca, čamu biełaruskaja mova źnikaje navat z takich zvykłych elemientaŭ haradskoj prastory.
«Viarnicie mnie maju rodnuju movu», — napisaŭ adzin ź ich.
«A čamu naohuł pamianiali, mnie voś cikava», — zadaŭsia pytańniem inšy.
U adkaz źjavilisia i bolš emacyjnyja mierkavańni pra ahulnyja pracesy rusifikacyi ŭ krainie: «Chutčej za ŭsio praces rusifikacyi paskoryŭsia. Z momantu kali ŭ Biełaruś pačali napłyvać rasiejcy, pačałasia tendencyja rusifikacyi, kab rasiejcy razumieli kudy jechać. Maja zdahadka, ale chutčej za ŭsio tak i jość».
«U Minsku ŭsio pa biełarusku», — pišuć u kamientarach, padkreślivajučy, što biełaruskaja mova ŭ transparcie dla minčan vyhladaje normaj.
Niekatoryja karystalniki navat prapanujuć bolš aktyŭnyja dziejańni: «Tak, dzie padpisać pietycyju!»