U Litvie ŭpaŭ bieśpiłotnik
Uviečary 17 maja va Ucianskim rajonie Litvy ŭ poli byŭ vyjaŭleny vajskovy bieśpiłotnik. Kiraŭnik Nacyjanalnaha centra kiravańnia kryzisami (NKVC) Vilmantas Vitkaŭskas na terminovaj pres-kanfierencyi zajaviŭ, što, papiarednie, aparat źjaŭlajecca ŭkrainskim.
Znojdzieny dron — raźbity, adnak bačnych śladoŭ vybuchu na miescy padzieńnia niama. Najaŭnaść bajavoha zarada ŭnutry aparata vyśviatlajuć śpiecyjalisty.
Radary Uzbrojenych sił Litvy ŭ hety dzień jaho palotu nie zafiksavali, pra dron paviedamili miascovyja žychary.
Pavodle analizu abłomkaŭ, litoŭski bok schilajecca da viersii, što heta ŭkrainski dron. Ź jakoj mienavita krainy jon zalacieŭ u Litvu, pakul dakładna nie vyznačana.
Ranicaj taho ž dnia (17 maja) jašče adzin bieśpiłotnik zalacieŭ na terytoryju Łatvii, paśla čaho pakinuŭ jaje pavietranuju prastoru.
Heta ŭžo nie pieršy padobny vypadak u Litvie. U sakaviku hetaha hoda na voziera Łavisas (Varenski rajon) kala miažy ź Biełaruśsiu taksama ŭpaŭ ukrainski vajskovy dron. Tady aficyjnyja instancyi paviedamili, što BPŁA nakiroŭvaŭsia dla ataki na abjekty ŭ Rasii, ale źbiŭsia z kursu z-za aktyŭnaj pracy rasijskich sistem radyjoelektronnaj baraćby (REB). Ekśpierty adznačajuć, što padobnyja incydenty ŭ apošnija miesiacy stali časta paŭtaracca pa ŭsim Bałtyjskim rehijonie.