Biełstat padličyŭ pakupnickuju zdolnaść biełarusaŭ u papularnych praduktach
Pa vynikach 2025 hoda našy dachody źmienšylisia ŭ jabłykach i bulbie, ale vyraśli ŭ miasie i małace. Takija vysnovy vynikajuć z analizu pakupnickaj zdolnaści siaredniedušavych najaŭnych hrašovych dachodaŭ nasielnictva, jaki prezientavaŭ Biełstat.
Fota: LookBy.Media
Office Life pahladzieŭ, jakuju kolkaść praduktaŭ možna było kupić na vieličyniu siaredniedušavoha najaŭnaha hrašovaha dachodu nasielnictva ŭ miesiac, a taksama paraŭnaŭ z tym, jak źmianiŭsia hety pakazčyk za hod.
Naprykład, u 2024 hodzie siaredniestatystyčny biełarus u miesiac moh kupić sabie 117,5 kiłahrama śvininy abo 130,1 kiłahrama miasa ptuški. U minułym hodzie hetych praduktaŭ možna było dazvolić užo 125,5 i 155,5 kh u miesiac adpaviedna. Pavialičylisia dachody i ŭ pieraliku na jajki (3,8 tys. suprać 3,3 tys. štuk u miesiac).
Bolš za ŭsio letaś vyraśli dachody biełarusaŭ u makaronie (438,8 kh u miesiac, što na 68,1 kh bolš, čym hodam raniej), cukry (jaho možna dazvolić sabie amal 539 kh u miesiac, heta na 77,3 kh bolš, čym u 2024-m) i morkvie (944,8 kh u miesiac i plus 152,2 kh u paraŭnańni z 2024 hodam).
A voś u rybie dachody, naadvarot, krychu źmienšylisia: 125,4 kh u miesiac u 2024 hodzie suprać 123,1 kh u 2025-m. Adznačym, što dachody ŭ hetym vypadku pieravodzili ŭ zamarožanuju rybu.
Taksama dachody ŭpali ŭ jabłykach: u 2025 hodzie ŭ miesiac siaredniestatystyčny biełarus moh dazvolić sabie 323,6 kh jabłykaŭ, hodam raniej hety pakazčyk składaŭ 342,3 kh.
Narešcie, dachody stali mienšymi i ŭ hałoŭnym nacyjanalnym pradukcie — bulbie: jaje my možam kupić 864,1 kh u miesiac, tady jak u 2024 hodzie dachodaŭ chapała na 905,9 kh. Niekalki hadoŭ tamu dastupnaść bulby była jašče nižejšaja — naprykład, u 2022 hodzie dachodaŭ chapiła b na 633,2 kh u miesiac.
U 2025 hodzie hrašovyja dachody ŭ raźliku na dušu nasielnictva skłali 1,6 tys. rubloŭ u miesiac, u 2024‑m hety pakazčyk byŭ na ŭzroŭni 1,4 tys. rubloŭ.