UEFA pažyćciova dyskvalifikavaŭ treniera, jaki tajemna zdymaŭ u raspranalni na videa svaju žanočuju kamandu
Paciarpiełych akazalisia kala 15 futbalistak, samaj małodšaj — 17 hadoŭ.
Fota: Dalibor Gluck / CTK via AP
Jeŭrapiejski futbolny sajuz (UEFA) pažyćciova adchiliŭ ad luboj dziejnaści, źviazanaj z futbołam, 42‑hadovaha češskaha śpiecyjalista Piatra Ułachoŭskaha, jaki raniej uznačalvaŭ žanočuju kamandu kłuba «Słavacka» i junijorskuju zbornuju krainy. Akramia hetaha, arhanizacyja źviarnułasia ŭ FIFA z patrabavańniem pašyryć hetuju zabaronu na ŭvieś śviet.
Da niejkaha času Ułachoŭski mieŭ u Čechii praktyčna biezdakornuju reputacyju — jon prapracavaŭ u struktury žanočaha futboła kala 15 hadoŭ i navat pryznavaŭsia najlepšym žanočym trenieram krainy.
Adnak vyśvietliłasia, što na praciahu čatyroch hadoŭ, z 2019 pa 2023 hod, mužčyna vykarystoŭvaŭ schavanuju ŭ zaplečniku minijaciurnuju kamieru, kab tajemna zdymać svaich padapiečnych. Paciarpiełymi akazalisia kala 15 futbalistak, samaj małodšaj — 17 hadoŭ.
Złačynstva raskryłasia ŭ vieraśni 2023 hoda, kali palicyja vyjaviła ŭ internecie zapisy z raspranalni i aryštavała treniera.
Dla samoj kamandy heta stała šokam, bo dziaŭčaty daviedalisia pra sačeńnie tolki paśla aryštu nastaŭnika. Paźniej paciarpiełyja pryznavalisia češskim žurnalistam, što pieražyty kašmar pakinuŭ ciažki psichałahičny śled: mnohija pačali bajacca spać pa načach i sutyknulisia z pastajannaj tryvožnaściu ŭ hramadskich miescach.
Sudovyja razbory pa hetaj spravie ciahnulisia niekalki hadoŭ. Spačatku sud prysudziŭ vypłacić achviaram nievialikuju hrašovuju kampiensacyju, a ŭ mai 2025 hoda kryminalny sud u Čechii pryznačyŭ Ułachoŭskamu adzin hod pazbaŭleńnia voli ŭmoŭna i zabaraniŭ pracavać trenieram unutry krainy na praciahu piaci hadoŭ.
Mižnarodny prafsajuz hulcoŭ FIFPRO paličyŭ taki prysud zanadta miakkim i zaklikaŭ da poŭnaha bana śpiecyjalista, zajaviŭšy, što navat bieskantaktavy seksualny hvałt zastajecca hvałtam, jaki patrabuje maksimalna surovaha adkazu.
Ciapierašniaje ž rašeńnie UEFA pavinna padać vyrazny sihnał usiamu spartyŭnamu śvietu, što nieprystojnym pavodzinam i hvałtu ŭ futbole miesca niama.