Ź Viciebska i Połacka płanujuć zapuścić novyja pryharadnyja ciahniki ŭ Rasiju

Jak zajaviŭ kiraŭnik administracyi Łukašenki Dźmitryj Kruty, ciapier abmiarkoŭvajecca mahčymaść zapusku maršrutaŭ pamiž Vialikimi Łukami ŭ rasijskaj Pskoŭskaj vobłaści i biełaruskimi haradami Viciebskam i Połackam. Popyt na takija pajezdki, jak adznačajecca, davoli vysoki, asabliva z boku rasijskaha prymiežnaha rehijona.

Zdymak ilustracyjny. Fota: «Naša Niva»

Adnak rašeńnie pra zapusk novych rejsaŭ budzie pryniata nie adrazu. Spačatku ŭłady chočuć acanić, nakolki zapatrabavanyja ŭžo dziejnyja čyhunačnyja maršruty — naprykład, pamiž Smalenskam i Viciebskam, a taksama Smalenskam i Oršaj. Dla hetaha treba chacia b adzin poŭny siezon nazirańniaŭ — da kanca hoda abo prynamsi da vosieni.

Tolki paśla analizu pasažyrapłyni buduć prymać rašeńnie pra adkryćcio novych pryharadnych maršrutaŭ.

Pakul što transhraničnyja ciahniki ŭ hetym rehijonie isnujuć u abmiežavanym farmacie: jany chodziać ad biełaruskaj stancyi Alešča da rasijskich Novasakolnikaŭ i Vialikich Łuk usiaho dvojčy na tydzień.

Akramia čyhunačnaha spałučeńnia, abmiarkoŭvajecca i adnaŭleńnie avijazłučeńnia pamiž Minskam i Pskovam. Raniej taki rejs užo zapuskaŭsia, ale praisnavaŭ niadoŭha — kala dvuch miesiacaŭ u 2023 hodzie. Ciapier pytańnie jaho adnaŭleńnia płanujuć razhladać na bolš vysokim uzroŭni, bo rehijonam składana samastojna finansavać takija prajekty.

Kamientary da artykuła