Tramp nakiravaŭ avijanosnuju ŭdarnuju hrupu da bierahoŭ Kuby paśla vystaŭleńnia abvinavačańniaŭ Raulu Kastra
U Karybskaje mora ŭvajšła avijanosnaja ŭdarnaja hrupa Vajenna-marskich sił ZŠA na čale z atamnym avijanoscam USS Nimitz, paviedamiła Paŭdniovaje kamandavańnie Uzbrojenych sił ZŠA u sacyjalnaj sietcy X.
Paŭdniovaje kamandavańnie Uzbrojenych sił ZŠA
Razam z avijanoscam u rehijon prybyli raźmieščanaja na im avijacyjnaja hrupa Carrier Air Wing 17, eśminiec USS Gridley i tankier zabieśpiačeńnia USNS Patuxent.
U kamandavańni padkreślili, što hetyja siły ŭvasablajuć «viaršyniu bajavoj hatoŭnaści, niepieraŭzydzienuju dalokaść paražeńnia, a taksama stratehičnuju pieravahu».
«USS Nimitz dakazaŭ svaju bajavuju moc pa ŭsim śviecie, zabiaśpiečvajučy stabilnaść i abaraniajučy demakratyju ad Tajvańskaha praliva da Piersidskaha zaliva», — havorycca ŭ paviedamleńni.
Zajava Paŭdniovaha kamandavańnia ZŠA źjaviłasia adrazu paśla taho, jak administracyja Donalda Trampa vyłučyła abvinavačańni suprać byłoha prezidenta Kuby i jaje nieaficyjnaha lidara Raula Kastra.
U pryvatnaści, ZŠA abvinavačvajuć 94‑hadovaha palityka ŭ zmovie z metaj zabojstva čatyroch čałaviek, uklučajučy troch amierykancaŭ.
Havorka idzie pra incydent 1996 hoda, kali čatyry ŭdzielniki arhanizacyi Brothers to the Rescue vylecieli ŭ miežach humanitarnaj misii, kab dapamahčy ludziam, što ŭciakali z Kuby na płytach. Kubinskija źniščalniki źbili dva hramadzianskija samaloty arhanizacyi nad mižnarodnymi vodami.