U Rasii zabaranili pisać pra zabarony
Kreml zabaraniŭ padkantrolnym ŚMI pisać pra zabarony. Łajalnyja žurnalisty vykručvajucca jak mohuć (heta vielmi składana) — i pišuć, što «Adzinaja Rasija» nibyta zmahajecca z zabaronami, piša «Mieduza».
Fota: Sefa Karacan / Anadolu Agency via Getty Images
«Adzinaja Rasija» — nie partyja zabaron», — pra heta zajaviŭ kiraŭnik hienieralnaha savieta «Adzinaj Rasii» Uładzimir Jakušaŭ 19 maja.
Jon zaklikaŭ deputataŭ nie dachodzić da «zabarončaha marazmu» i dadaŭ, što ŭ bolšaści vypadkaŭ ludzi «sami raźbiarucca, što i jak abmiažoŭvać».
Jakušaŭ dadaŭ, što kiraŭnictva partyi vyrašyła źmianić publičnuju rytoryku — kab u ŚMI nie źjaŭlalisia «dzikija» inicyjatyvy, nie ŭzhodnienyja z AR.
Pra zabarony ŭ tym ža klučy prykładna miesiac tamu, u kancy krasavika, havaryŭ i sam Uładzimir Pucin. Na pasiadžeńni Savieta zakanadaŭcaŭ prezident zaklikaŭ deputataŭ i sienataraŭ «nie zacyklivacca na zabaronach», bo heta «kontrpraduktyŭna».
Choć Pucin mieŭ na ŭvazie tolki abmiežavańni ŭ śfiery biznesu, u Kramli, vidać, zhodnyja z tym, što fiksacyja na zabaronach, asabliva ŭ publičnaj prastory, niepažadanaja — asabliva napiaredadni vieraśnioŭskich vybaraŭ u Dziarždumu i na fonie padzieńnia rejtynhaŭ Pucina i «partyi ŭłady».
Palityčny błok administracyi prezidenta nastojliva paprasiŭ dziaržaŭnyja i łajalnyja ŭładam ŚMI jak maha radziej vykarystoŭvać u svaich artykułach słova «zabarona». Patrabavańni pačali pastupać z AP niekalki dzion tamu. Pra heta «Mieduzie» raskazali dva supracoŭniki prakramloŭskich vydańniaŭ i rabotnik dziaržaŭnaha ŚMI.
Pavodle ich słoŭ, Kreml asobna prasiŭ nie vynosić słova «zabarona» ŭ zahałoŭki i ŭ cełym raiŭ «mienš pisać na hetyja temy — zabarony, abmiežavańni i štrafy».
«Jość vyklučeńnie, — z uśmieškaj kaža adzin žurnalist. — [Pisać možna], kali zabaronu admianiajuć». (Ale ŭ apošnija hady ŭ Rasii nie admianili nivodnaj zabarony.)
Jakimi farmuloŭkami zamianiać słova «zabarona», u administracyi prezidenta nie ŭdakładnili.
Apošniaja ŭviedzienaja ŭładami zabarona — na zdymku atak dronaŭ i ich nastupstvaŭ. Jana ŭžo dziejničaje ŭ niekalkich rehijonach, naprykład u Leninhradskaj, Ciumienskaj i Irkuckaj abłaściach, a taksama ŭ Maskvie, jakaja ŭ noč na 17 maja padvierhłasia biesprecedentnamu ŭdaru ŭkrainskich dronaŭ.
Supracoŭniki prakramloŭskich ŚMI ŭžo pačali prytrymlivacca rekamiendacyj Kramla.
- U «Haziecie» i «Lencie» zabaronu na zdymku dronaŭ u Maskvie nazvali «abmiežavańniami».
- U vydańni MSK1 navinu pra toje, što anałahičnuju zabaronu chočuć uvieści ŭ Padmaskoŭi, nazvali tak: «U Maskoŭskaj vobłaści ŭzmocniać štrafy za parušeńnie mier antyterarystyčnaj biaśpieki».
- U «Haziecie» prydumali taki zahałovak: «U Maskvie abmiažujuć raspaŭsiudžvańnie danych pra terakty».
«Atrymlivajecca, što nibyta nijakich zabaronaŭ niama: prosta pavieličeńnie štrafaŭ», — iranizuje supracoŭnik łajalnaha ŭładzie ŚMI.
«Zabarona na zabarony» vyklikaje nie tolki ciažkaści z farmuloŭkami, adznačaje žurnalist z bujnoha chołdynhu, jaki pracuje z rehijanalnymi ŭładami. Na jaho dumku, čytač nie adkryje navinu z abstraktnym zahałoŭkam, ź jakoha niezrazumieła, pra što pojdzie havorka ŭ tekście, — i ŭ vyniku nie atrymaje važnuju infarmacyju.
«Administracyja [rehijona] uvodzić zabaronu, joj treba paviedamić pra heta ludziam. Jana za heta hatovaja płacić [redakcyi], ale nam, vychodzić, infarmavać nielha», — skardzicca jon.