Treniera zbornaj Biełarusi pa plažnym futbole pryznali najlepšym u śviecie

Ispanskaha nastaŭnika zbornaj Biełarusi pa plažnym futbole Nikałasa Alvarada pryznali najlepšym trenieram śvietu 2025 hoda. Uznaharodu jamu ŭručyli na ŭračystaści «Zorki plažnaha futboła-2025», paviedamili ŭ Nacyjanalnym alimpijskim kamitecie (NAK).

Nikałas Alvarada

Za zvańnie najlepšaha treniera Nikałas Alvarada zmahaŭsia z Emilijana Del Dukam, jaki ŭznačalvaje zbornuju Italii, i Ałanam Kavalkanci — trenieram žanočaj zbornaj Partuhalii.

U 2025 hodzie zbornaja Biełarusi pad kiraŭnictvam Alvarada dajšła da finału čempijanatu śvietu, jaki prachodziŭ na Siejšelskich astravach. U vyrašalnym matčy biełarusy hulali z Brazilijaj, u jakim sastupili 3:4 i zavajavali srebra. Akramia taho, kamanda ŭziała bronzu Jeŭralihi.

Nikałas Alvarada pracuje sa zbornaj Biełarusi z 2017 hoda. Da pačatku trenierskaj karjery jon sam hulaŭ u plažny futboł: vystupaŭ za zbornuju Ispanii, a ŭ 2013 hodzie staŭ ź joj vice-čempijonam śvietu.

Akurat u hetyja dni, darečy, zbornaja Biełarusi pad kiraŭnictvam Nikałasa Alvarada startavała na ispanskich plažach u El-Puerta-de-Santa-Maryja ŭ novym siezonie Jeŭralihi. U pieršym tury papiaredniaha etapu ŭ hrupie A biełarusy ź vialikim likam abyhrali turkaŭ — 10:2, a ŭ druhim — zbornuju Čechii ź likam 8:3. 22 maja jany praviaduć matč z partuhalcami. U nastupny raŭnd projduć dźvie najlepšyja kamandy.

Paralelna tam ža taksama prachodziać spabornictvy ŭ kvartecie V, dzie vystupajuć zbornyja Polščy, Šviejcaryi, Litvy i Ispanii. A ŭ pačatku žniŭnia ŭ Kišyniovie projduć adboračnyja turniry ŭ hrupach C (Italija, Francyja, Małdova, Rumynija) i D (Ukraina, Estonija, Hiermanija, Danija). Paśla finišu spabornictvaŭ u stalicy Małdovy vyznačacca vosiem udzielnikaŭ supierfinału, jaki adbudziecca 8—13 vieraśnia ŭ italjanskim Vijaredža.

Kamientary da artykuła