ES i Mieksika padpisali maštabnaje handlovaje pahadnieńnie
U adpaviednaści z novym pahadnieńniem Mieksika admianiaje praktyčna ŭsie pošliny na impart ź ES. Akramia taho, likvidujucca biurakratyčnyja barjery ŭ handli, a taksama płanujecca spraścić dostup da dziaržaŭnych zakupak, piša DW.
Antoniu Košta, Kłaŭdzija Šejnbaum i Ursuła fon der Lajen, fota Daniel Cardenas/Anadolu via Getty Images
Paśla dziesiaci hadoŭ pieramovaŭ Jeŭrapiejski sajuz i Mieksika padpisali abnoŭlenaje pahadnieńnie ab handli i supracoŭnictvie. «Uličvajučy ciapierašniuju hieapalityčnuju situacyju, naša partniorstva važnaje jak nikoli», — zajaviŭ u piatnicu ŭ Miechika staršynia Jeŭrapiejskaj rady Antoniu Košta.
Jak adznačajecca, u adpaviednaści z novym pahadnieńniem Mieksika admianiaje praktyčna ŭsie myty na impart z krain ES. Akramia taho, likvidujucca biurakratyčnyja barjery ŭ handli, a taksama płanujecca spraścić dostup da dziaržaŭnych zakupak. Pierad padpisańniem Košta i kiraŭnica Jeŭrakamisii Ursuła fon der Lajen sustrelisia z prezidentkaj Mieksiki Kłaŭdzijaj Šejnbaum.
Heta byŭ pieršy za apošnija dziesiać hadoŭ samit pamiž kiraŭnictvam ES i druhoj pa vieličyni ekanomikaj Łacinskaj Amieryki.
Pavodle słoŭ fon der Lajen, Jeŭropa maje namier padtrymać pahadnieńnie inviestycyjami ŭ pamiery piaci miljardaŭ jeŭra. Hetyja srodki pavinny pajści na infrastrukturnyja prajekty ŭ Mieksicy.
Miarkujecca rost ekspartu Mieksiki ŭ paŭtara raza za čatyry hady.
Pavodle acenak Ministerstva ekanomiki Mieksiki, novaje pahadnieńnie moža pavialičyć ekspart krainy ŭ ES da 2030 hoda prykładna ŭ paŭtara raza — da kala 31 miljarda jeŭra za hod. Zaraz ES štohod ekspartuje ŭ Mieksiku tavary na 56 młrd jeŭra, a ahulny abjom handlu pamiž bakami za dziesiacihodździe vyras na 75 pracentaŭ.
Novaje pahadnieńnie praduhledžvaje biazmytny dostup amal dla ŭsich tavaraŭ, u tym liku dla mieksikanskaha kurynaha miasa i sparžy, a taksama jeŭrapiejskaha suchoha małaka, syru i śvininy, choć i z peŭnymi kvotami.
U śviatle handlovaj palityki ciapierašniaj administracyi prezidenta ZŠA Donalda Trampa i inšych hłabalnych vyklikaŭ ES i Mieksika majuć namier dyviersifikavać svaje handlovyja adnosiny i ŭmacoŭvać partniorstva, adznačyli baki na sustrečy ŭ Miechika. Akramia handlovych pytańniaŭ, novaja viersija pahadnieńnia taksama ŭklučaje pałažeńni pa temach źmianieńnia klimatu, pravoŭ čałavieka i mižnarodnaha supracoŭnictva.
Padpisańnie finalnaha pahadnieńnia ź Mieksikaj adbudziecca paśla ratyfikacyi ŭ ramkach ES
Pavodle spravazdačy niamieckaha dziaržaŭnaha źniešniehandlovaha ahienctva Germany Trade & Invest, Mieksika maje namier pastupova admianić myty na takija pradukty, jak miasa ptuški, śvinina, syr i šakaład.
Pahadnieńnie ź Jeŭrasajuzam taksama abaraniaje hieahrafičnyja ŭkazańni pachodžańnia šerahu praduktaŭ: parmskaj viandliny, bavarskaha piva, tyrolskaha biekona dy inšych. Pry hetym ES zabiaśpiečvaje sabie «dostup da najvažniejšych syravinnych resursaŭ» krainy, vynikaje z papiaredniaha pahadnieńnia.
Paśla zaviaršeńnia pracesu ratyfikacyi ŭ ramkach ES miarkujecca padpisańnie hłabalnaha pahadnieńnia pamiž Brusielem i Miechika. Dziakujučy Paŭnočnaamierykanskamu pahadnieńniu ab svabodnym handli z ZŠA i Kanadaj, Mieksika, nasielnictva jakoj składaje 130 miljonaŭ čałaviek, źjaŭlajecca važnym vytvorčym centram, u tym liku dla niamieckich kampanij.