Paškodžany budynak Łanhbarda i razburany muziej «Čarnobyl». Vyniki rasijskaj ataki na histaryčny centr Kijeva
Masiravanaja rasijskaja ataka na Kijeŭ 24 maja pryviała da značnych razbureńniaŭ u histaryčnym centry stalicy. Siarod paciarpiełych abjektaŭ — budynak MZS, Nacyjanalny mastacki muziej i praktyčna całkam źniščany muziej «Čarnobyl», jaki tolki miesiac tamu adkryŭsia paśla restaŭracyi.
Pažar u budynku muzieja «Čarnobyl» u Kijevie ŭ vyniku rasijskaha ŭdaru. Fota: news.pn
Najbolš katastrafičnyja nastupstvy ŭdar mieŭ dla Nacyjanalnaha muzieja «Čarnobyl», jaki raźmiaščaŭsia na Padole ŭ histaryčnym budynku pažarnaj čaści. Jon byŭ amal całkam źniščany.
Asablivaha trahizmu situacyi dadaje toj fakt, što ŭstanova adkryłasia dla naviedvalnikaŭ tolki 27 krasavika 2026 hoda paśla praciahłaj restaŭracyi, prymierkavanaj da 40‑j hadaviny avaryi na ČAES.
Razbureńni budynka muzieja «Čarnobyl» u Kijeva. Fota: Čarnobylski zapaviednik
Parušanaja ekspazicyja muzieja «Čarnobyl» u Kijevie. Fota: zapaviednik «Staražytny Kijeŭ»
Jak paviedamiŭ kiraŭnik Asacyjacyi čarnobylskich apierataraŭ Jarasłaŭ Jemialjanienka, razbureńni vielmi značnyja. Supracoŭniki ciapier raźbirajuć zavały i ratujuć toje, što jašče možna vyratavać. Pavodle jaho słoŭ, u susiednich damach pavylatali vokny, a ŭ adnoj z kvater jamu daviałosia zatrymać maradziora.
Razbureńni vakoł muzieja «Čarnobyl» u Kijeva. Fota: news.pn
Ranicaj paškodžany muziej naviedali prezident Uładzimir Zialenski i kiraŭnik MUS Ihar Klimienka, jaki nazvaŭ hety ŭdar «śviadomaj atakaj na historyju i praŭdu».
Udar pa centry «staražytnaj Rusi»
Paškodžańni atrymaŭ i budynak Ministerstva zamiežnych spraŭ Ukrainy. Pavodle słoŭ ministra Andreja Sibihi, u budynku, uźviedzienym pa prajekcie architektara Iosifa Łanhbarda ŭ 1939 hodzie, vybiła vokny. Jon asabliva adznačyŭ, što zbudavańnie nie mieła paškodžańniaŭ z časoŭ Druhoj suśvietnaj vajny.
«Rasijskija ŭdary byli nakiravanyja na histaryčny rajon, mienavita ŭ centr staražytnaj Rusi. Jašče adzin dokaz taho, što my majem spravu z ordami varvaraŭ», — dadaŭ ministr.
Taksama vybuchovaj chvalaj zakranuła Nacyjanalny mastacki muziej Ukrainy. Kalekcyja i supracoŭniki ŭstanovy nie paciarpieli, adnak sam budynak, jaki źjaŭlajecca pomnikam architektury, atrymaŭ paškodžańni.
Paškodžańni Nacyjanalnaha mastackaha muzieja Ukrainy. Fota: Minkultury Ukrainy
Paškodžańni Nacyjanalnaha mastackaha muzieja Ukrainy. Fota: Minkultury Ukrainy
Razbureńni zafiksavanyja i ŭ inšych histaryčnych łakacyjach. U zapaviedniku «Staražytny Kijeŭ» paciarpieŭ Kantraktovy dom, a na Paštovaj płoščy — Paštovaja stancyja i carkva Rastva Chrystova. Kinarežysiorka Iryna Ciłyk paviedamiła pra paškodžańni Kijeŭskaj opiery na Padole.
Ataka na Kijeŭ 24 maja była vielmi masiravanaj. Ahułam, pa papiarednich dadzienych, było vypuščana kala 90 rakiet i 600 bieśpiłotnikaŭ roznych typaŭ. U rajonie Biełaj Carkvy zafiksavana vykarystańnie balistyčnaj rakiety «Arešnik» (RS-26 «Rubiež»). U Kijevie zahinuli jak minimum dva čałavieki, jašče 56 atrymali ranieńni, siarod ich jość dzieci.