U Kramli prakamientavali zvarot Źviahincava da Pucina «skončyć užo hetuju bojniu»
Piaskoŭ zajaviŭ, što ŭ słavutaha režysiora «niama prava hołasu».
Andrej Źviahincaŭ na ŭručeńni premii ŭ Kanach. Fota: AP Photo / Andreea Alexandru
Pres-sakratar prezidenta RF Dźmitryj Piaskoŭ zajaviŭ, što rasijski režysior Andrej Źviahincaŭ nie maje prava zaklikać da spynieńnia vajny Rasii z Ukrainaj. Tak Kreml adreahavaŭ na pramovu režysiora na Kanskim kinafiestyvali, dzie 23 maja jon atrymaŭ Hran-pry za svoj novy film «Minataŭr».
Sa sceny Źviahincaŭ źviarnuŭsia da Uładzimira Pucina z zaklikam: «Skončycie ŭžo hetuju bojniu. Uvieś śviet čakaje hetaha».
Na bryfinhu 25 maja Piaskoŭ adznačyŭ, što asabista jon pieradavać hetyja słovy Pucinu nie budzie, i vykazaŭ sumnieŭ, što heta zrobić niechta inšy.
Svaju pazicyju pradstaŭnik Kramla patłumačyŭ tak: «Źviahincaŭ nikoli nie asudžaŭ kryvavuju bojniu, jakuju ŭčyniŭ kijeŭski režym na Danbasie. Pačynajučy z 2014 hoda, kali pačałasia vajna. Voś kali b jon tady heta rabiŭ, napeŭna, u jaho było b prava hołasu. A zaraz u jaho takoha prava niama».
Piaskoŭ taksama dadaŭ, što ŭ Kramli film «Minataŭr» nie hladzieli.
Kinakrytyk Anton Dolin nazvaŭ «Minataŭr», jaki atrymaŭ Hran-pry ŭ Kanach, jak pieršuju mastackuju kinastužku, pryśviečanuju Rasii epochi «śpiecyjalnaj vajennaj apieracyi».