Žančyny ŭ achovie i braniavany kartež. Jak Ukraina arhanizavała biaśpieku vizitu Cichanoŭskaj u Kijeŭ
Čornyja miniveny, ciažki ŭsiedarožnik u centry kartežu, supracoŭniki achovy pobač litaralna na kožnym kroku i chutkaja dapamoha ŭ supravadžeńni. Uzrovień biaśpieki padčas vizitu Śviatłany Cichanoŭskaj u Kijeŭ byŭ maksimalny.
Fota tut i dalej: pres-słužba Ofisa Śviatłany Cichanoŭskaj
Źniešnie ŭsio vyhladała strymana: nijakich matacykłaŭ palicyi, mihałak abo demanstratyŭnaha pierakryćcia vulic. U haradskim patoku heta byli čornyja mašyny, jakija jechali na nievialikaj dystancyi adna ad adnoj.
Ale za hetaj źniešniaj «niabačnaściu» stajała pradumanaja sistema biaśpieki.
Uzrovień pieršych asob
Pra toje, što heta budzie vizit ź vielmi surjoznym uzroŭniem biaśpieki, stała zrazumieła jašče pa darozie ŭ Kijeŭ.
Adrazu pa pierasiačeńni polska-ŭkrainskaj miažy ŭ vahon biełaruskaj delehacyi zajšli dvoje supracoŭnikaŭ ukrainskaj dziaržaŭnaj achovy. Vysokija, spakojnyja, z racyjami i zbrojaj. Jany padčas vizitu ŭvieś čas manitoryli situacyju z pavietranymi tryvohami, rakietami i dronami i pieršymi atrymlivali infarmacyju. Tamu kali ŭ Kijevie hučała pavietranaja tryvoha, možna było być upeŭnienymi — kali achoŭniki spakojnyja, značyć, usio ŭ paradku.
Achovu zabiaśpiečvała Upraŭleńnie dziaržaŭnaj achovy Ukrainy — struktura, jakaja adkazvaje za biaśpieku kiraŭnictva krainy i zamiežnych delehacyj vysokaha ŭzroŭniu. Mienavita hetyja supracoŭniki supravadžajuć prezidentaŭ, premjeraŭ i mižnarodnyja misii padčas pajezdak pa Ukrainie.
Pad ich achovaj znachodziŭsia taksama i hatel, dzie žyła biełaruskaja delehacyja. Cikavy fakt: hetyja ž achoŭniki harantavali biaśpieku prynca Hary padčas jaho vizitu ŭ Kijeŭ.
Achova, jakaja ŭśmichajecca
Pobač sa Śviatłanaj Cichanoŭskaj pastajanna znachodzilisia achoŭniki, i nie tolki mužčyny. Tak, Śviatłanu achoŭvali taksama dziaŭčaty, što byvaje davoli redka.
Achoŭnica była pry Śviatłanie Cichanoŭskaj z samaha jaje prybyćcia na vakzał u Kijeŭ.
Śviatłana Cichanoŭskaja prybyvaje ŭ Kijeŭ.
U pieršy dzień jana była maksimalna sabranaj, surjoznaj i niešmatsłoŭnaj. U kancy druhoha dnia vizitu ŭ peŭny momant jana šeptam źviarnułasia da fatohrafa:
«Pryniasicie joj (Śviatłanie — NN) vadzički, jana vielmi stamiłasia».
Kali fatohraf prynios šklanku z vadoj, achoŭnica, stojačy za śpinaj Śviatłany, adnymi vusnami pramoviła «Dziakuj».
Achova supravadžała delehacyju paŭsiul, u tym liku ŭnutry dziaržaŭnych budynkaŭ — kantralavała kalidory, maršruty i pieramiaščeńni.
Lubaja zališniaja ŭvaha — heta ryzyka
Daradca Śviatłany Cichanoŭskaj Dzianis Kučynski pryznajecca: uzrovień arhanizacyi i biaśpieki byŭ adzin z samych vysokich, jakija jon bačyŭ.
«Ukrainski bok faktyčna ŭziaŭ na siabie ŭsiu łahistyku i biaśpieku delehacyi. Nie na kožnym vizicie byvaje słužba pratakołu, jakaja ŭvieś čas supravadžaje i vyrašaje ŭsie pytańni. Tut jany zrabili ŭsio tak, što nam zastavałasia prosta nazirać, jak prafiesijna ludzi robiać svaju pracu», — kaža jon.
Pry hetym pazicyja samoj Cichanoŭskaj zastavałasia niaźmiennaj:
«Mienš šumu, mienš mihałak».
Jakija mašyny byli ŭ kartežy?
Kartež biełaruskaj delehacyi składaŭsia ź niekalkich mašyn, u tym liku palicejskich mašyn napieradzie i zzadu, a taksama chutkaj dapamohi.
Asnoŭnymi mašynami kartežu byli Volkswagen Multivan, Ford Tourneo Custom i Toyota Land Cruiser 300.
Volkswagen Multivan užo šmat hadoŭ vykarystoŭvajuć jeŭrapiejskija delehacyi, słužby achovy i dziaržaŭnyja struktury. Mašyna maje vialiki sałon, vysoki ŭzrovień kamfortu i dobruju manieŭranaść. Unutry takija aŭtamabili časta adaptujuć pad patreby delehacyj: ustaloŭvajuć dadatkovuju suviaź abo śpiecyjalnaje abstalavańnie.
Takija miniveny rehularna možna pabačyć padčas samitaŭ NATO, sustreč ES i mižnarodnych pieramoŭ.
Pobač u kartežy išoŭ Ford Tourneo Custom. Hetyja miniveny apošnija hady aktyŭna vykarystoŭvajuć ukrainskija dziaržaŭnyja struktury i mižnarodnyja delehacyi. Novyja madeli majuć kamiery kruhavoha ahladu, sistemy kantrolu pałasy ruchu i elektronnyja asistenty kiroŭcy. Dla kartežaŭ heta važna: mašyny pavinny ruchacca dakładna i sinchronna navat u ščylnym haradskim ruchu.
Braniavany čorny Land Cruiser 300 — centralnaja mašyna kartežu. Mienavita ŭ takim jechała Śviatłana Cichanoŭskaja padčas pieramiaščeńnia pa Kijevie.
Heta adzin z samych papularnych aŭtamabilaŭ dla dziaržaŭnaj achovy. Land Cruiser 300 vykarystoŭvajuć siłavyja struktury, słužby biaśpieki i VIP-kartežy ŭ roznych krainach — ad Blizkaha Uschodu da Jeŭropy.
Hałoŭnaja pryčyna — nadziejnaść. Hety pazadarožnik raźličany na składanyja ŭmovy, drennyja darohi i praciahłuju pracu. Land Cruiser časta vykarystoŭvajuć u krainach z pavyšanymi ryzykami biaśpieki, jany abaraniajuć ad strałkovaj zbroi i vybuchaŭ.