Biełaruski «złodziej u zakonie» ŭdzielničaŭ u anłajn-schodkach aŭtarytetaŭ va ŭkrainskich SIZA

U Departamiencie stratehičnych rasśledavańniaŭ Nacyjanalnaj palicyi Ukrainy paviedamili, što biełaruski «złodziej u zakonie» Alaksandr Miadźviedzieŭ pa mianušcy «Miedźviažonak Homielski» ŭdzielničaŭ sama mieniej u 14 złačynnych schodach, na jakich abmiarkoŭvali farmiravańnie «abščaka», piša «Radyjo Svaboda».

Alaksandr Miadźviedzieŭ («Miedźviažonak Homielski»)

Jak adznačajecca ŭ paviedamleńni departamientu, za apošnija niekalki miesiacaŭ u «abščak» pieraličyli bolš za 700 tysiač hryŭniaŭ (amal 16 tysiač dalaraŭ), jakija sabrali ad raspaŭsiudžvańnia narkotykaŭ siarod źniavolenych u Chmialnickim śledčym izalatary. Aproč taho, śledčyja zadakumientavali šmatlikija fakty vymahalnictva hrošaj.

Hetuju dziejnaść pad kiraŭnictvam dvuch «złodziejaŭ u zakonie», u tym liku biełaruskaha, u izalatary ažyćciaŭlaŭ hramadzianin Azierbajdžana, viadomy pa mianušcy «Ramin Hianžynski», jaki nieadnarazova adbyvaŭ pakarańni ŭ Rasii, a letaś jaho zatrymali va Ukrainie. U funkcyjanavańni złačynnaj sietki ŭdzielničali asoby, jakija mieli status «smotriaŝich» za SIZA, za «hulnioj i čornym», a taksama «za karancinam».

Pavodle śledčych, schodki adbyvalisia ŭ farmacie aŭdyjo– i videakanfierencyj pamiž źniavolenymi roznych ustanoŭ vykanańnia pakarańniaŭ, a taksama z udziełam asob, jakija znachodzilisia na svabodzie i za miežami Ukrainy.

«Padčas takich schodak udzielniki abmiarkoŭvali raźmierkavańnie śfier upłyvu, kaardynacyju złačynnaj dziejnaści, zbor srodkaŭ u «abščak», narkatrafik, praviadzieńnie azartnych hulniaŭ, a taksama miechanizmy cisku na inšych aryštantaŭ», — adznačyli ŭ departamiencie palicyi.

Aprača taho, zadakumientavali 12 faktaŭ vymahalnictva hrošaj u asob, jakija znachodzilisia ŭ śledčym izalatary, a taksama šmatlikija fakty zbytu psichatropaŭ i narkotykaŭ. Paciarpiełych prymušali pieradavać ad 30 do 80 tysiač hryŭniaŭ (ad 670 da 1 800 dalaraŭ).

Apieratyŭnyja słužby palicyi sumiesna z SBU i dvuma śpiecyjalnymi padraździaleńniami praviali adnačasova adrazu niekalki vobšukaŭ u kamierach śledčaha izalatara i pa miescy pražyvańnia asobnych fihurantaŭ. Padčas vobšukaŭ skanfiskavali mabilnyja telefony, bankaŭskija kartki, u tym liku i tyja, na jakich akumulavali srodki «abščaka», čarnavyja zapisy i hrošy.

Piaci ŭdzielnikam złačynnych schodak, jakija znachodziacca ŭ SIZA, vystavili padazreńni pavodle šaści artykułaŭ Kryminalnaha kodeksa Ukrainy, u tym liku ŭ arhanizacyi złačynnych schodaŭ, vymahalnictvie, pahrozach supracoŭnikam pravaachoŭnych orhanaŭ, u niezakonnym zbycie psichatropaŭ i narkotykaŭ. Pra zavočnaje vystaŭleńnie padazreńnia biełaruskamu «złodzieju ŭ zakonie» nie paviedamlajuć.

Alaksandr Miadźviedzieŭ naradziŭsia ŭ Homieli 2 studzienia 1970 hoda. Upieršyniu trapiŭ u turmu ŭ 2006 hodzie. Pieršyja prysudy atrymaŭ za kradziažy, a paźniej — za vymahalnictva i raspaŭsiud narkotykaŭ. Adbyvaŭ pakarańni ŭ roznych papraŭčych kałonijach Biełarusi — u Vaŭkavysku, Baranavičach, Mazyry, Hłybokim, Viciebsku i Homieli. U 2012 hodzie jaho karanavali na zładziejskaj schodcy ŭ Dubai. Ale mianušku «Miedźviažonak Homielski» jon atrymaŭ paśla pieršych prysudaŭ.

Paśla adnaho z vyzvaleńniaŭ Miadźviedzieŭ vyjechaŭ ź Biełarusi ŭ Rasiju, ale ŭ sakaviku 2013 hoda jaho zatrymali ŭ Maskvie ŭ miežach sumiesnaj biełaruska-rasijskaj śpiecyjalnaj apieracyi. Praz hod paśla adbyvańnia ŭ Murmanskaj vobłaści pakarańnia za raspaŭsiud narkotykaŭ jaho etapavali ŭ Biełaruś. U 2014 hodzie ŭ Homieli jaho asudzili na 7 hadoŭ pazbaŭleńnia voli za vymahalnictva.

U sakaviku 2024 hodu načalnik HUBAZiKa Andrej Ananienka ŭ intervju dziaržaŭnamu vydańniu sb.by paviedamiŭ pra čarhovaje vyzvaleńnie Alaksandra Miadźviedzieva z turmy i namiaknuŭ, što jon znoŭ pakinuŭ terytoryju Biełarusi.

Kamientary da artykuła