Braniavik z kulamiotam i viertalot u niebie. Achovu Pucina ŭ Astanie biesprecedentna ŭzmacnili
Padčas pieramiaščeńnia Uładzimira Pucina pa stalicy Kazachstana jaho kartež supravadžajuć nie tolki dziasiatki aŭtamabilaŭ i matacyklistaŭ, ale i śpiecyjalizavanaja vajskovaja technika.
Skryn videa
U kartežy Pucina ŭ Astanie zaŭvažyli braniavik ź miescam dla kulamiotčyka na dachu i, mahčyma, mašynu z REB. U niebie prajezd prykryvaŭ viertalot, piša «Ahientstvo».
Na kadrach prajezdu Pucina da Pałaca niezaležnaści, dzie prachodziać pieramovy lidaraŭ Rasii i Kazachstana, vidać, što limuzin akružajuć 14 matacykłaŭ i kala dvuch dziasiatkaŭ aŭtamabilaŭ.
Zamykaŭ kałonu vajskovy aŭtamabil. Pavodle acenki OSINT-analityka Kiryła Michajłava, heta, chutčej za ŭsio, braniavy aŭtamabil «Ałan» z pazicyjaj dla kulamiotčyka na dachu.
Taksama ŭ kartežy zaŭvažyli mašynu z kanstrukcyjaj na dachu, jakaja, jak miarkuje Michajłaŭ, moža być sistemaj REB.
Prajezd rasijskaha kartežu i ŭviečary ŭ sieradu, i ranicaj u čaćvier kantralavaŭ viertalot u niebie.
Prynamsi adna z vulic padčas ruchu była pierakryta branievikom. Jašče adzin braniavy aŭtamabil zaŭvažyli kala Pałaca niezaležnaści.
Uzdoŭž daroh stajali vajskoŭcy ŭ kamuflažy z aŭtamatami.
Raniej Słužba dziaržaŭnaj achovy Kazachstana papiaredžvała pra abmiežavańni dla transpartu ŭ Astanie padčas hetaha vizitu i praviadzieńnia pasiadžeńnia Vyšejšaha Jeŭrazijskaha ekanamičnaha savieta. Viedamstva adkryta zajaŭlała, što «mierapryjemstvy praduhledžvajuć vykarystańnie resursaŭ śpiecyjalnych dziaržaŭnych, pravaachoŭnych orhanaŭ i ŭzbrojenych sił, u tym liku vajennaj avijacyi i techniki».
Na pačatku maja zachodniaja raźviedka dapuściła ŭciečku ŭ ŚMI infarmacyi pra toje, što FSA (Fiederalnaja słužba achovy RF) uzmacniła miery biaśpieki vakoł Pucina: jon pierastaŭ jeździć na Vałdaj i pracuje nibyta ŭ abaronienych bunkierach.