U Minsku zaasfaltavali parkoŭku, abyšoŭšy aŭtamabil, jaki stajaŭ na joj FOTAFAKT

U internecie zavirusiłasia fota z mašynaj u Minsku, jakaja sama staić na piasku, a vakoł jaje ŭžo pakładzieny novy asfalt. Rolik nabraŭ bolš za miljon prahladaŭ, a tamu darožnikam daviałosia navat kamientavać situacyju, paviedamlaje ahienctva «Minsk-Naviny».

Incydent adbyŭsia ŭ dvary doma na praśpiekcie Pieramožcaŭ, 77. Kamunalnyja słužby pravodzili płanavyja raboty pa abnaŭleńni darožnaha pakryćcia na parkoŭcy. Jak paviedamili ŭ administracyi Centralnaha rajona, žycharoŭ zahadzia papiaredzili — abjavy pra ramont byli vyviešanyja ŭ padjezdach za niekalki dzion.

Adnak adzin z aŭtaŭładalnikaŭ pa niejkich pryčynach usio ž pakinuŭ svaju mašynu na miescy. Bolš za toje, jak paviedamlajecca, aŭtamabil stajaŭ tam z samaj nočy. Ranicaj, pierad pačatkam rabot, darožniki pieradali infarmacyju pra transpart u DAI.

Uładalnik, ź jakim źviazalisia, patłumačyŭ, što nie moža apieratyŭna prybrać mašynu i zmoža zrabić heta tolki paśla 18:00. A pakolki aŭtamabil byŭ u nie vielmi dobrym techničnym stanie (stary, z prykmietami znosu), było pryniata rašeńnie nie evakujavać jaho.

U vyniku darožnyja słužby apynulisia pierad vybaram: ci čakać niekalki hadzin i zatrymlivać uvieś praces, ci praciahvać raboty. Pakolki ŭkładka asfaltu — heta technałahičny praces, jaki patrabuje bieśpierapynnaści (asabliva kali ŭžo padrychtavana pakryćcio i pryviezieny materyjał), było vyrašana nie spyniacca.

Tady rabočyja prosta ŭkłali asfalt na ŭsich svabodnych učastkach i akuratna abyšli mašynu. A paśla taho, jak aŭtamabil prybrali, heta miesca daasfaltavali asobna, pra što vykłali adpaviednaje fota.

Kamientary da artykuła