U Homieli zakładčyk pradaŭ śmiarotnuju dozu mietadonu i atrymaŭ 14 hadoŭ
Pavieryŭšy ŭ lohki zarobak, žychar Homiela staŭ kurjeram narkašopu. A paśla ad pradadzienaj im dozy pamior čałaviek.
32‑hadovy mužčyna zabiraŭ z tajnikaŭ partyi narkotykaŭ, fasavaŭ ich na drobnyja dozy i znoŭ rabiŭ zakładki. «Zarobak» atrymlivaŭ na kryptakašalok. Heta praciahvałasia paŭhoda, pakul adna z partyj nie stała dla homielčanina fatalnaj, piša «Biełka».
Tady jon atrymaŭ zadańnie rasfasavać mietadon i vykanaŭ jaho. Troje znajomych paśla źmieny skinulisia i kupili dozu. Taki sposab «rassłabicca» kalehi praktykavali i raniej. Jany ŭžyli narkotyk i razyšlisia pa damach.
Ale adzin ź siabroŭ pierastaŭ vychodzić na suviaź. Inšyja zaniepakoilisia i znajšli jaho siastru. Kali jana pryjechała i adčyniła kvateru brata, to vyjaviła jaho ŭžo miortvym.
Paźniej sudmiedekśpierty paćvierdzili: pryčynaj śmierci stała pieradaziroŭka mietadonam. Kancentracyja narkotyku ŭ kryvi zahinułaha šmatrazova pieravysiła śmiarotnuju dozu.
Zakładčyka, jaki rasfasoŭvaŭ mietadon, milicyja zatrymała z dokazami ŭ haražy ŭ adnaho z svajakoŭ.
«Dziejańni abvinavačanaha, z ulikam śmierci narkazaležnaha, byli kvalifikavanyja pa bolš ciažkim artykule. Vinu jon pryznaŭ, na sudzie skazaŭ, što pra takija nastupstvy svaich dziejańniaŭ nie zadumvaŭsia. Mužčyna asudžany na 14 hadoŭ pazbaŭleńnia voli i štraf 200 bazavych vieličyń (9000 rubloŭ)», — paviedamiła staršy pamočnik prakurora horada Homiela Natalla Kapitanava.