Rasija moža nanieści ŭdar pa vajskovym abjekcie ŭ Jeŭropie, kab raskałoć sajuźnikaŭ Ukrainy — ekśpiert Bild
«Dapuścim, niekalki kryłatych rakiet traplajuć u Polšču pa mierkavanym składzie zbroi i hinuć dvanaccać čałaviek».
Uładzimir Pucin ź ministram abarony Rasii Andrejem Biełavusavym, fota Contributor / Getty Images
Ekśpiert pa źniešniaj palitycy Rasii Chana Note skazała ŭ padkaście šefa-redaktara Bild Paula Roncchajmiera, što Uładzimir Pucin nie moža prymusić Ukrainu kapitulavać, i tamu isnuje ryzyka, što jon pojdzie na eskałacyju suprać Jeŭropy. Pavodle jaje słoŭ, pakolki ŭkraincy pastajanna atakujuć rasijski tył, vajennaja łohika, vierahodna, pryviadzie Kreml da idei ataki stratehičnaha tyłu Ukrainy — ES.
Pry hetym ekśpiert nie čakaje maštabnaha napadu na NATA abo adkryćcia novaha frontu ŭ Jeŭropie. Chutčej heta moža być ataka na adzin abjekt u dziaržavie NATA — kab spravakavać składanuju dyskusiju ŭnutry aljansu, pasiejać strach i «złamać kansensus adnosna doŭhaterminovaj padtrymki Ukrainy».
Note apisvaje mahčymy scenar: «Dapuścim, niekalki kryłatych rakiet traplajuć u Polšču pa mierkavanym składzie zbroi […] i hinuć dvanaccać čałaviek.
Što tady adbyvajecca palityčna ŭ nas u Jeŭropie? Ci ŭsie adrazu skažuć: heta artykuł 5 [Paŭnočnaatłantyčnaj damovy], to-bok vypadak kalektyŭnaj abarony? I my adzinym frontam adkažam vajennym šlacham? Ci palaki skažuć: my adkažam. A inšyja krainy NATA zajaviać: ustupać u kanfrantacyju z Rasijaj z-za hetaha dla nas zanadta ryzykoŭna».
U takim vypadku, ličyć ekśpiert, Rasija mahła b surjozna asłabić NATA palityčna, nie ŭdajučysia da maštabnaha napadu.
Chana Note ŭznačalvaje Jeŭrazijskuju prahramu Centra Džejmsa Marcina, a taksama zajmaje pasadu staršaha navukovaha supracoŭnika Centra stratehičnych i mižnarodnych daśledavańniaŭ u Vašynhtonie.