Amierykaniec, jaki atrymaŭ prytułak u Biełarusi, viarnuŭsia ŭ ZŠA
Evan Ńjuman navat adkryŭ u Breście restaran.
U Biełaruś Evan Ńjuman dabiraŭsia praz Ukrainu, pierajšoŭšy miažu nielehalna ŭ vieraśni 2021 hoda. Amierykanca adrazu ž pakazali pa dziaržaŭnym telebačańni, mienš čym praz hod dali palityčny prytułak, nahadvaje historyju ŭciokaŭ Radyjo Svaboda.
Na radzimie, u ZŠA, Ńjumana padazravali ŭ 14 złačynnych epizodach, u tym liku ŭ šturmie dziaržaŭnaha budynka i napadzie na aficeraŭ palicyi.
Nieŭzabavie paśla atrymańnia statusu palityčnaha ŭciekača Ńjuman asieŭ u Breście, dzie pačaŭ pracavać repietytaram anhlijskaj movy dla dziaciej, a zatym adkryŭ restaran amierykanskaj kuchni Route 66. «Mianie ździviła, jakija ŭ vas čystyja vulicy i jak usio dakładna arhanizavana, — raskazvaŭ Ńjuman u adnym ź intervju biełaruskim prapahandystam. — Aŭtobusy jeździać pastajanna, ciahniki jeździać pastajanna. Heta pryjemna ździviła».
Uvosień 2024 hoda pasadu prezidenta ZŠA zaniaŭ Donald Tramp, Ńjuman staŭ jaho aktyŭnym prychilnikam. Zimoj 2025 hoda Tramp pamiłavaŭ Ńjumana razam ź inšymi ŭdzielnikami šturmu Kapitolija.
Niekatory čas paśla hetaha amierykaniec zastavaŭsia ŭ Breście. Ale ŭžo letam 2025 hoda sacsietki Route 66 pierastali abnaŭlacca, a pa adrasie amierykanskaha restarana źjaviłasia inšaja ŭstanova.
«Jany zakrylisia letam jašče», — skazali tam «Svabodzie» pra los bresckaha biźniesu Ńjumana.
Jak stała viadoma «Svabodzie», u centry vyvučeńnia anhlijskaj movy, dzie amierykaniec pracavaŭ paśla atrymańnia palityčnaha prytułku ŭ Biełarusi, jaho taksama bolš niama.
Niekalki krynic paćvierdzili, što nieŭzabavie paśla pamiłavańnia Ńjuman viarnuŭsia ŭ ZŠA.