Stvaralnik «Zornych vojnaŭ» rychtuje da adkryćcia svoj futurystyčny muziej koštam miljard dalaraŭ FOTY
Maštabny prajekt užo staŭ adnoj z samych niezvyčajnych architekturnych słavutaściaŭ Łos-Andželesa. Pieršych naviedvalnikaŭ čakajuć u vieraśni 2026 hoda, a pakul abmiarkoŭvajuć jaho dyzajn i napaŭnieńnie.
Muziej apaviadalnaha mastactva Łukasa. Fota: Sean M. Haffey / Getty Images
Stvaralnik suśvietu «Zornych vojnaŭ» nieŭzabavie adkryje ŭ Łos-Andželesie Muziej apaviadalnaha mastactva Łukasa (Lucas Museum of Narrative Art), historyja stvareńnia jakoha pačałasia jašče ŭ 2017 hodzie. Napiaredadni adkryćcia ŭ siecivie źjavilisia novyja kadry budynka, jaki ŭžo staŭ adnoj z samych niezvyčajnych architekturnych słavutaściaŭ horada.
Budynak Muzieja. Fota: ucasmuseum.org
Jak paviedamlaje New York Post, u muziei buduć pradstaŭleny tvory mastactva, komiksy, ilustracyi i kinaartefakty z kalekcyi, jakuju Džordž Łukas źbiraŭ dziesiacihodździami. Razam z žonkaj Miełady Chobsan jon inviestavaŭ u prajekt kala 1 miljarda dalaraŭ.
Interjer Muzieja. Fota: Eric Thayer / Los Angeles Times via Getty Images.
Budynak muzieja, sprajektavany kitajskim architektaram Ma Jańsunam ź biuro MAD architects, vyłučajecca futurystyčnym eksterjeram, jaki nahadvaje kaśmičny karabiel. U asnovie kancepcyi lažać arhaničnyja formy: adsutnaść vostrych kutoŭ i płaŭnyja linii fasada adsyłajuć da pryrodnych abrysaŭ vobłakaŭ i dreŭ.
Fasad składajecca z bolš čym 1500 unikalnych panelaŭ, vyrablenych z palimieru, armavanaha škłovałaknom. Muziejny kompleks zajmaje płošču kala 28 tysiač kvadratnych mietraŭ i raźmieščany na ŭčastku amal 4,5 hiektara, jaki ŭklučaje raźvituju parkavuju zonu.
Unutranaja prastora ŭstanovy abjadnoŭvaje bolš za 30 halerej, ahulnaja płošča jakich pieravyšaje 9 tysiač kvadratnych mietraŭ. Akramia vystavačnych załaŭ, infrastruktura muzieja ŭklučaje niekalki kinateatraŭ, navučalnyja studyi, biblijateku, a taksama punkty hramadskaha charčavańnia.
Fond muzieja naličvaje kala 40 tysiač abjektaŭ, ź jakich dla startavych ekspazicyj adabrana bolš za 1200 pradmietaŭ. Asobnaje miesca ŭ struktury muzieja zojmie vystava «Zornyja vojny ŭ ruchu» («Star Wars in Motion»), pryśviečanaja vizualnaj historyi pieršych šaści filmaŭ sahi «Zornyja vojny».
Ź placoŭki pierad Muziejem naviedvalnikaŭ sustrakaje aryhinalny źniščalnik N-1 Starfighter, jaki vykarystoŭvaŭsia padčas zdymak filma «Zornyja vojny. Epizod I: Schavanaja pahroza». Fota: lucasmuseum / instagram
Siarod ekspanataŭ buduć pradstaŭleny aryhinalnyja kaściumy, dekaracyi i techničnyja madeli, u tym liku łendśpider Luka Skajuokiera i pieršy fizičny pratatyp kołavaha matacykła hienierała Hryvusa. Razam z tym, značnaja častka fondaŭ pryśviečana kłasičnamu mastactvu i ilustracyi: u inaŭhuracyjnych vystavach buduć pradstaŭleny pracy takich majstroŭ, jak Norman Rokueł, Frenk Frazeta i Makśfiłd Peryš.
Ekspazicyi buduć pakazvać, jak źmianialisia sposaby apaviadańnia historyj praź vizualnyja vobrazy — ad staražytnych skulptur i reniesansnaha žyvapisu da fatahrafii, komiksaŭ i sučasnaha kino. Asobnyja vystavy buduć pryśviečany temam siamji, supolnaści, pracy, palityki i pryhod. Adkryćcio muzieja zapłanavana na 22 vieraśnia 2026 hoda.