Izrail i Livan damovilisia ab spynieńni ahniu. Hałoŭnaj umovaj zastajecca admova «Chiezbały» ad abstrełaŭ
Pa ŭmovach pahadnieńnia, «Chiezbała» musić całkam spynić ahoń, a jaje bajeviki — pakinuć terytoryju na poŭdni Livana.
Ludzi masava pakidajuć paŭdniovy Biejrut u čakańni ŭdaru Izraila. Fota: Houssam Shbaro/Anadolu via Getty Images
Izrail i Livan damovilisia ab zachavańni režymu spynieńnia ahniu, havorycca ŭ zajavie Dziaržaŭnaha departamienta ZŠA. Pahadnieńnie «zaležyć ad poŭnaha spynieńnia» ahniu z boku ŭzbrojenaj hrupoŭki «Chiezbała», jakuju padtrymlivaje Iran, piša Bi-bi-si.
U zajavie ukazvajecca, što «budučynia adnosin pamiž Izrailem i Livanam pavinna vyrašacca dvuma suvierennymi ŭradami», a lubyja sproby «z boku luboha dziaržaŭnaha abo niedziaržaŭnaha subjekta ŭziać budučyniu Livana ŭ zakładniki» rašuča adchilajucca.
Pa ŭmovach pahadnieńnia, «Chiezbała» pavinna całkam spynić ahoń, a jaje bajeviki — pakinuć terytoryju na poŭdni Livana, ad miažy da raki Litani, jakaja ŭ pahadnieńni nazyvajecca Paŭdniovym siektaram Litani. Zaraz hetuju terytoryju kantraluje izrailskaja armija.
U kancy sakavika ministr abarony Izraila Israel Kac zajaviŭ, što Armija abarony Izraila stvoryć zonu biaśpieki na šyrokaj terytoryi paŭdniovaha Livana, i šmatlikim tysiačam pieramieščanych asob nie budzie dazvolena viarnucca da taho času, pakul paŭnočny Izrail nie stanie biaśpiečnym.
Pahadnieńnie ab spynieńni ahniu adbyłosia paśla častkovaha spynieńnia ahniu, uzhodnienaha ŭ paniadziełak, zhodna ź jakim, pa zajavie Livana, Izrail ustrymajecca ad bambardzirovak Biejruta ŭ abmien na admovu «Chiezbały» ad napadaŭ na Izrail.
Dźvie krainy sustrenucca znoŭ 22 červienia dla praviadzieńnia dalejšych pierahavoraŭ «z metaj dasiahnieńnia ŭsioabdymnaha pahadnieńnia». «Chiezbała» pakul publična nie prakamientavała hetuju zajavu.
Pahadnieńnie było dasiahnuta paśla taho, jak u sieradu izrailskija i livanskija dypłamaty praviali druhi dzień pierahavoraŭ u Vašynhtonie, kab zamacavać umovy ździełki.
Dziaržsakratar ZŠA Marka Rubia zajaviŭ žurnalistam, što spadziajecca na raspracoŭku «płana dziejańniaŭ pa zabieśpiačeńni biaśpieki ŭ [Livanie], niezaležnaha ad «Chiezbały»».
Na hetym tydni pahadnieńnie ab častkovym spynieńni ahniu praviarali na tryvałaść jak izrailskija vojski, tak i «Chiezbała».
Izrailskija vajskoŭcy zajavili ab pierachopie bieśpiłotnika i dvuch snaradaŭ, zapuščanych ź Livana.
U svaju čarhu, ministerstva achovy zdaroŭja Livana paviedamiła ab dzieviaci zahinułych u vyniku izrailskich udaraŭ pa terytoryi krainy ŭ sieradu. U ich liku — dva fielčary, jakija stali achviaraj udaru pa mašynie chutkaj dapamohi ŭ paŭdniovym rajonie Šechur.
Zhodna z zajavaj livanskaha ŭrada, u papiarednim pahadnieńni ab spynieńni ahniu, dasiahnutym u paniadziełak, havorycca, što «Izrail nie pačnie šyrokamaštabnaha nastupleńnia na Biejrut u abmien na admovu «Chiezbały» ad napadaŭ na Izrail».
Urad Livana zajaviŭ, što «Chiezbała» paćvierdziła svaju zhodu, ale člen palityčnaha savieta hrupoŭki Machmud Kamaci zajaviŭ u aŭtorak Bi-bi-si: «Pahadnieńnia ab spynieńni ahniu nie było, była tolki abarona Dachii». Dachija — heta paŭdniovaja častka Biejruta, jakaja ličycca aporaj «Chiezbały». Pa hetym rajonie Izrail čaściej za ŭsio nanosić udary.
Kamaci taksama zajaviŭ, što «Chiezbała» nie budzie vykonvać nijakija abaviazacielstvy, uziatyja na siabie na livana-izrailskich pierahavorach u Vašynhtonie.
«My ličym, što hetyja pierahavory nas nie datyčać, i my nie pryznajem ich vysnovy abo rašeńni, pakolki my pryncypova ich adchilajem», — skazaŭ jon.