Siamju ź Minska buduć sudzić za zdradu dziaržavie i kantrabandu zbroi. Ich, padobna, zatrymali na miažy — voś što viadoma
Rabotniki dziciačaha sadka Dźmitryj i Taćciana Korsakavy za kratami, ich dačku Piełahiju płanujuć sudzić zavočna.
Taćciana, Piełahija i Dźmitryj Korsakavy. Fota z «Adnakłaśnikaŭ» Dźmitryja Korsakava
Taćcianie Korsakavaj 57 hadoŭ. Pa źviestkach Belpol, jana pracavała vychavalnicaj daškolnaj adukacyi ŭ dziciačym sadku №518. Maje pieršuju kvalifikacyjnuju katehoryju.
Taćciana Korsakava. Fota z «Adnakłaśnikaŭ»
Jaje muž, 58‑hadovy Dźmitryj Korsakaŭ, pracavaŭ u tym ža sadku rabočym. Raniej, miarkujučy pa sacsietkach, jon haniaŭ aŭtamabili z-za miažy.
Dźmitryj Korsakaŭ. Fota ź jahonaj staronki «Ukantakcie»
Ichniaj dačce Piełahii 28 hadoŭ. Raniej, pa źviestkach Biełsata, pracavała ŭ dziciačych sadkach, a paśla ŭ minskim kafe na Kujbyšava, 22 (ciapier tam Haryzont Chab). Ciapier dziaŭčyna žyvie va Ukrainie.
Piełahija Korsakava. Fota ź jaje instahrama
Siamja ŭ ich niebahataja, ale družnaja. Dźmitryj lubić majstravać i dabudoŭvać niešta na ŭłasnym leciščy, siamjoj jany chadzili ŭ hryby i padarožničali pa Biełarusi i zamiežžy. U sacsietkach pary anijakaha «kryminału» — miemy, hulni i zdaroŭje.
Apošni raz Dźmitryj byŭ anłajn 23 vieraśnia 2025 — nieŭzabavie paśla hetaha jaho i žonku zatrymali, padobna, na miažy.
Pavodle infarmacyi pravaabaroncaŭ, abaim inkryminavanyja č. 1 art. 356 KK (zdrada dziaržavie), č. 4 art. 295 KK (niezakonnyja dziejańni sa zbrojaj, bojeprypasami i vybuchovymi rečyvami) i č. 3 art. 333‑1 KK (niezakonnaje pieramiaščeńnie praź miažu niebiaśpiečnych rečyvaŭ i zbroi). Na momant padrychtoŭki spravy da suda jany znachodziacca pad vartaj.
Ich dačce Piełahii Korsakavaj taksama inkryminavana zdrada dziaržavie. Jaje vyklikajuć u sud, ale razhlad budzie zavočny. Akaličnaści spravy nieviadomyja.
Čytajcie taksama:
Pa ciažkich artykułach buduć sudzić, vierahodna, cełuju siamju