U Kienii znoŭ pabačyli «pryvida lesu», jaki bajalisia, što ŭžo źnik

U Kienii navukoŭcy ŭpieršyniu za bolš jak piać hadoŭ zafiksavali na fotapastki hornych bonha — redkich antyłop, jakich nazyvajuć «pryvidam lesu» z-za ich utojlivaha ładu žyćcia i zdolnaści zastavacca niezaŭvažanymi ŭ hustych lasach, paviedamlaje Iflscience.com.

Zdymak ilustracyjny. Fota: MBP and Chester Zoo

Raniej ličyłasia, što hetyja žyvioły źnikli z rehijona Maasai-Mau i zachavalisia tolki ŭ harach Abierder. Pryčynaj rezkaha skaračeńnia ich kolkaści stali brakańjerstva i źniščeńnie naturalnaha asiarodździa pražyvańnia. Siońnia horny bonha znachodzicca na miažy źniknieńnia.

Kab acanić stan papulacyi, navukoŭcy i pryrodaachoŭniki pastavili sietku fotapastak u roznych lasnych rajonach, u tym liku prykładna za 200 kiłamietraŭ ad Abierderskich hor. Atrymanaja znachodka stała sapraŭdnaj siensacyjaj: kamiery zafiksavali niekalkich bonha ŭ addalenym frahmiencie lesu Maasai-Mau.

Pa słovach śpiecyjalistaŭ, adzin z hetych samcoŭ, mahčyma, užo traplaŭ na vočy daśledčykam jašče ŭ 2018 hodzie, ale tolki ciapier udałosia atrymać dakumientalnaje paćviardžeńnie jaho prysutnaści.

Pryrodaachoŭniki adznačajuć, što heta adkryćcio daje novuju nadzieju na vyratavańnie vidu. Pavodle apošnich acenak, u dzikaj pryrodzie zastałosia mienš za 40 hornych bonha. Tamu ciapier raspracoŭvajucca dadatkovyja miery achovy lasoŭ, dzie byli zaŭvažanyja hetyja žyvioły.

Častkaj prahramy pa zachavańni vidu taksama stała raźviadzieńnie bonha ŭ zaaparkach z nastupnym vypuskańniem u dzikuju pryrodu. Śpiecyjalisty spadziajucca, što heta dapamoža pavialičyć kolkaść žyvioł i zachavać ich hienietyčnuju raznastajnaść.

Na dumku daśledčykaŭ, viartańnie «pryvida lesu» ŭ Maasai-Mau śviedčyć pra toje, što navat vielmi redkija vidy mohuć zachoŭvacca ŭ pryrodzie značna daŭžej, čym mierkavałasia. Jany padkreślivajuć, što źniknieńnie hetaj niezvyčajnaj antyłopy stała b vialikaj strataj dla ŭsioj suśvietnaj pryrodnaj spadčyny.

Kamientary da artykuła