Z tušy zahinułaha kita Cimi narobiać kaściavoj muki i bijapaliva

Paśla niadaŭniaj hibieli znakamitaha harbataha kita pa mianušcy Cimi kala dackaha vostrava Ancholt jahonyja pareštki byli nakiravany na pierapracoŭku na pradpryjemstva ŭ horadzie Raniers u Danii, paviedamlaje Euronews.

Skrynšot ź videa

Vada, jakaja źmiaščałasia ŭ tušy žyvioły, ciapier prachodzić ačystku i skidajecca ŭ susiedni fijord. Tłušč vykarystoŭvajecca dla vytvorčaści bijadyziela. Kości, suchažylli i skuru pierapracoŭvajuć u drobnuju masu, jakaja zatym vykarystoŭvajecca jak bijapaliva. Častka kostak, u tym liku taz i kaniečnaści, pieradadzienyja ŭ kalekcyju Muzieja naturalnaj historyi ŭ Kapienhahienie.

Hetaha kita ŭpieršyniu pabačyli 3 sakavika na piasčanaj vodmieli kala ŭźbiarežža Hiermanii ŭ Bałtyjskim mory. Žyvioła była zabłytanaja ŭ rybałoŭnych sietkach. Paśla vyzvaleńnia kit jašče niekalki razoŭ vykidaŭsia na bierah, niahledziačy na sproby jamu dapamahčy.

Paźniej hrupa vałancioraŭ na śpiecyjalnym sudnie pieraviezła jaho ŭ bok Paŭnočnaha mora i 2 maja vypuściła na hłybokaj vadzie. Adnak praz 13 dzion kita znajšli miortvym kala vostrava Ancholt.

Padčas uskryćcia tušy, darečy, vyśvietliłasia, što Cimi, niahledziačy na mužčynskaje imia — nie samiec, a samka. Pry hetym jana nie była ciažarnaj.

Unutranyja orhany žyvioły ŭtrymlivali parazitaŭ, ale śpiecyjalisty adznačyli, što heta zvyčajnaja źjava i nie mahła stać pryčynaj śmierci. U kišečniku znajšli reštki rybałoŭnaj sietki, jakija mahli vyklikać dyskamfort i prablemy sa zdaroŭjem.

Dakładnaja pryčyna śmierci žyvioliny pakul nie ŭstanoŭlenaja. Častka orhanaŭ mocna paciarpieła ad raskładańnia jašče da pačatku daśledavańniaŭ, a vynikaŭ niekatorych analizaŭ daviadziecca čakać niekalki miesiacaŭ.

Navukoŭcy taksama razhladajuć mahčymaść taho, što transpartavańnie i vypusk kita ŭ adkrytaje mora mahli paŭpłyvać na jaho stan. Razam z tym daśledčyki spadziajucca atrymać dadatkovuju infarmacyju z danych trekiera, jaki byŭ zamacavany na žyviole pierad vypuskam.

Kamientary da artykuła