Pryznačany novy ministr pryrodnych resursaŭ
Raniej Maksim Łysienka byŭ pieršym namieśnikam ministra, a pierad tym čatyry hady ŭznačalvaŭ paśpiachovy Dziaržynski rajon.
Maksim Łysienka naradziŭsia ŭ 1984 hodzie. Jon maje try vyšejšyja adukacyi. U 2007 hodzie skončyŭ BDTU pa śpiecyjalnaści «Lasnaja haspadarka». U 2010 hodzie atrymaŭ dypłom Minskaha instytuta kiravańnia («ekanomika i kiravańnie na pradpryjemstvie»). U 2025 hodzie skončyŭ Akademiju kiravańnia pa śpiecyjalnaści «Dziaržaŭnaje kiravańnie i prava».
Pracavaŭ viadučym śpiecyjalistam, a paśla ŭznačalvaŭ Dziaržynskuju rajonnuju inśpiekcyju pryrodnych resursaŭ i achovy navakolnaha asiarodździa.
Z 2017 pa 2019 hady zajmaŭ pasadu namieśnika staršyni Minskaha abłasnoha kamiteta pryrodnych resursaŭ, paśla čaho sam uznačaliŭ hety kamitet.
U sakaviku 2021 hoda časova źmianiŭ ekałahičny profil i pajšoŭ na pavyšeńnie ŭ vykanaŭčuju ŭładu, uznačaliŭšy Dziaržynski rajvykankam. Na pasadzie staršyni rajona jon pracavaŭ da červienia 2025 hoda.
1 lipienia 2025 hoda Łysienka byŭ viernuty ŭ viedamstva i pryznačany na pasadu pieršaha namieśnika ministra pryrodnych resursaŭ i achovy navakolnaha asiarodździa, dzie pracavaŭ da ciapierašniaha pryznačeńnia.
Były ministr pryrody Siarhiej Maślak byŭ aryštavany pa abvinavačańni ŭ chabarnictvie.