Kamandujučy vojskami ZŠA ŭ Jeŭropie zajaviŭ, što Pucin nie šukaje vajny z NATA
Niahledziačy na heta, hienierał Hrynkievič, jaki taksama kiruje siłami ZŠA ŭ Jeŭropie, zajaviŭ: «Kali mianie pytajuć: «Ci hatovy vy zmahacca ŭžo siońnia?», — ja adkazvaju: «Biezumoŭna».
Rasija «nie šukaje kanfliktu» z NATA, zajaviŭ hałoŭnakamandujučy abjadnanymi siłami NATA ŭ Jeŭropie Aleksus Hrynkievič, adkazvajučy na pytańnie pra mahčymaść jaje napadu na krainy Bałtyi. Pavodle jaho słoŭ, heta tłumačycca nastupnym: u Maskvie razumiejuć, što takoje «abarončy aljans» i što ŭ NATA «jość šerah asimietryčnych pieravah», piša Moscow Times.
Svaju zadaču Hrynkievič bačyć u tym, kab «Rasija zrazumieła: kali jana pasprabuje niešta zrabić u krainach Bałtyi, u jaje heta nie atrymajecca». Pakolki ŭ Maskvie «viedajuć, što ŭ ich ničoha nie vyjdzie, jany nie buduć ryzykavać, prymajučy padobnyja dziejańni», dadaŭ jon.
ZŠA skaračajuć svaju vajennuju prysutnaść u Jeŭropie, jakaja adnačasova imkniecca pavialičyć vajennuju mahutnaść u śviatle źmieny pryjarytetaŭ Vašynhtona. Ź Jeŭropy mohuć być vyviedzieny avijanosnaja ŭdarnaja hrupa, usie padvodnyja łodki, asnaščanyja kryłatymi rakietami, niekalki marskich patrulnych samalotaŭ «Pasiejdon», samaloty-zapraŭščyki, źniščalniki F-16 i F-15E, paviedamlała hazieta Die Welt.
Hrynkievič upieršyniu paćvierdziŭ infarmacyju pra skaračeńni: «Havorka idzie pra hrupy vajenna-pavietranych i vajenna-marskich sił, jakija patrebnyja nam, ZŠA, na vypadak uźniknieńnia kanfliktnaj situacyi ŭ Cichaakijanskim rehijonie».
Niahledziačy na heta, hienierał, jaki taksama kiruje siłami ZŠA ŭ Jeŭropie, zajaviŭ: «Kali mianie pytajuć: «Ci hatovy vy zmahacca ŭžo siońnia?», — ja adkazvaju: «Biezumoŭna».
Jeŭrapiejskija vajennyja ŭ svaich vystupleńniach vykazvajuć značna bolšyja aściarohi adnosna płanaŭ Rasii. Pra jaje namiery ci hatoŭnaść pajści na ŭzbrojeny kanflikt z krainami NATA ŭ pieryjad ad ciapierašniaha hoda da kanca dziesiacihodździa najčaściej zajaŭlajuć vajennyja i vyviedniki krain Bałtyi, paŭnočna-ŭschodniaj Jeŭropy, Hiermanii.
U pryvatnaści, uzdoŭž miežaŭ krain na ŭschodnim fłanhu NATA za apošnija dva hady viadziecca maštabnaje budaŭnictva vajennych baz. Jany mohuć być ukamplektavany sałdatami pa zakančeńni vajny va Ukrainie, ličać vajennyja raźviedki Šviecyi. «My nie ličym, što jany isnujuć tolki dla vidovišča. Havorka idzie pra toje, kab u budučyni Rasija była hatovaja supraćstajać NATA ŭ vypadku bolš maštabnaha kanfliktu», — śćviardžaje jaje dyrektar Tomas Nilsan.
Čytajcie taksama:
Naščadka emihrantaŭ ź Biełarusi pryznačyli hałoŭnakamandujučym abjadnanych siłaŭ NATA ŭ Jeŭropie