Biełaruskija dziaržaŭnyja chakiery praviali chvalu kibieratak na akaŭnty elektronnaj pošty ŭ Polščy

U Polščy zafiksavali novuju chvalu kibieratak na ŭlikovyja zapisy elektronnaj pošty Gmail, jakija naležać polskim hramadzianam. Pavodle infarmacyi polskich śpiecyjalistaŭ pa kibierbiaśpiecy z CERT Polska, za hetymi dziejańniami staić chakierskaja hrupa UNC1151, taksama viadomaja pad nazvaj Ghostwriter, jakuju źviazvajuć z uładami Biełarusi, piša Onet.pl.

Zdymak ilustracyjny. Fota: magnific.com

Ekśpierty adznačajuć, što hetaja hrupa ŭžo šmat hadoŭ zastajecca adnoj z najbolš aktyŭnych siarod tych, za čyjoj dziejnaściu sočyć CERT Polska. Asnoŭnym mietadam jaje pracy źjaŭlajucca fišynhavyja ataki — machlarskija sproby padmanam prymusić čałavieka paviedamić svoj parol, kod paćviardžeńnia abo inšyja danyja, nieabchodnyja dla dostupu da elektronnaj pošty.

Meta takich kampanij — atrymać poŭny dostup da paštovych skrynak karystalnikaŭ Gmail. Paśla ŭzłomu, jak paviedamlaje CERT Polska, złamyśniki vyvučajuć źmieściva skrynki i šukajuć infarmacyju, jakaja moža być dla ich karysnaj.

U pieršuju čarhu jany analizujuć śpisy kantaktaŭ, kab znajści novych ludziej, suprać jakich možna arhanizavać nastupnyja ataki. Akramia taho, ich cikaviać važnyja dakumienty, asabistyja abo słužbovyja materyjały, a taksama infarmacyja pra inšyja akaŭnty, źviazanyja z elektronnaj poštaj, naprykład staronki ŭ sacyjalnych sietkach. Atrymaŭšy dostup da takich ulikovych zapisaŭ, chakiery mohuć vykarystoŭvać ich dla dalejšych atak, raspaŭsiudžvańnia falšyvaj infarmacyi abo inšych škodnych dziejańniaŭ.

Takim čynam, uzłom adnoj elektronnaj skrynki moža stać tolki pieršym etapam bolš šyrokaj kibierapieracyi, bo atrymanyja ź jaje źviestki dazvalajuć vybirać novyja celi i pašyrać maštab atak.

Polskija śpiecyjalisty ŭ kibierbiaśpiecy padkreślivajuć, što hrupa UNC1151/Ghostwriter praciahvaje być surjoznaj pahrozaj dla polskaj infarmacyjnaj prastory, tamu karystalnikam elektronnaj pošty varta być asabliva ŭvažlivymi: nie adkryvać padazronyja listy i spasyłki, praviarać sapraŭdnaść staronak uvachodu i vykarystoŭvać dadatkovuju abaronu svaich akaŭntaŭ, naprykład dvuchfaktarnuju aŭtentyfikacyju.

Kamientary da artykuła