Siem samych pryhožych aeraportaŭ śvietu

Ad ahladnaj placoŭki pad adkrytym niebam da stalnoha «lesu» i interjeraŭ, natchnionych narodnym placieńniem — sučasnyja avijachaby pieratvarajucca ŭ sapraŭdnyja architekturnyja šedeŭry. U śviežy śpis samych estetyčnych aeraportaŭ śvietu ŭvajšli siem abjektaŭ, dzie dyzajn ličycca takim ža važnym, jak i efiektyŭnaść. Siarod ich — futurystyčnyja prastory aeraportaŭ Azii i Amieryki, a taksama adzin znakavy terminał u Jeŭropie.

Aeraport u Huvachaci, Indyja. Fota: narendramodi / Instagram

Novy śpis samych pryhožych aeraportaŭ śvietu byŭ pradstaŭleny ŭ štab-kvatery JUNIESKA ŭ miežach prestyžnaj architekturnaj premii Prix Versailles.

Hetaja mižnarodnaja ŭznaharoda štohod adznačaje abjekty, jakija najbolš paśpiachova spałučajuć u sabie kreatyŭnaść, adlustravańnie miascovaj kultury i pryncypy ekałahičnaj adkaznaści. Pry vybary pieramožcaŭ žury aceńvaje nie tolki vonkavy vyhlad budynkaŭ, ale i toje, nakolki harmanična jany ŭpisvajucca ŭ sacyjalny kantekst rehijona.

Pavodle słoŭ arhanizataraŭ premii, sučasnyja terminały bolš nie źjaŭlajucca prosta prastorami dla pierasadki; jany stanoviacca znakavymi abjektami svajoj epochi, jakija dapamahajuć źmiakčyć kanflikt pamiž nieabchodnaściu chutkaha pieramiaščeńnia i žadańniem čałavieka pravodzić čas u kamfortnym i natchnialnym asiarodździ. Vydańnie Daily Mail pradstaŭlaje siem aeraportaŭ, jakija byli pryznanyja samymi pryhožymi ŭ śviecie.

Mižnarodny aeraport Bajiuń, Terminał 3 (Huančžou, Kitaj)

Huančžou, viadomy jak «Horad kvietak», słavicca svajoj admietnaj architekturaj, i Terminał 3 aeraporta Bajiuń udała spałučaje ŭ sabie histaryčnuju spadčynu z sučasnym stylem. Hałoŭnaj krynicaj natchnieńnia tut stała pryroda: stylizavanyja matyvy abłokaŭ, vady i kvietak farmujuć intuityŭna zrazumiełuju, napoŭnienuju śviatłom płaniroŭku z płaŭnymi arhaničnymi linijami, jakija nakiroŭvajuć pasažyraŭ.

Tut jość terasy, atryum i sad — uklučajučy samuju vysokuju siarod kitajskich aeraportaŭ ahladnuju placoŭku pad adkrytym niebam.

Aeraport Frankfurta, Terminał 3 (Hiermanija)

Terminał 3 aeraporta Frankfurta byŭ zadumany jak efiektyŭnaja, ale pry hetym žyvaja i dynamičnaja prastora. Kab zabiaśpiečyć padarožnikam utulnaść i adčuvańnie znajomaha asiarodździa, jaho pierachody, vychady na pasadku i zały čakańnia svaim vyhladam nahadvajuć haradskija vulicy i płoščy.

Architekturnuju kampazicyju dapaŭniajuć try art-abjekty ŭ vyhladzie kolcaŭ, jakija padviešany da stoli. Jany sabrany z kalarovych aluminijevych dyskaŭ i bieśpierapynna kruciacca, stvarajučy łandšaft, jaki ŭvieś čas źmianiajecca i abnaŭlajecca.

Mižnarodny aeraport imia Łakapryi Hapinata Bardałoja, Terminał 2 (Huvachaci, Indyja)

Hety aeraport maje adnu klučavuju asablivaść, jakaja i paspryjała jaho pieramozie: jon ščyra i napoŭnicu ŭvasablaje duch Indyi.

Šyrokija aračnyja stoli, što paŭtarajuć płaŭnyja pryrodnyja linii, nahadvajuć pra sakralnyja krajavidy i samabytnyja tradycyi dojlidstva. U toj ža čas narodnaje mastactva, etničnyja siužety i vyraby miascovych majstroŭ harmanična intehravany ŭ interjery.

Mižnarodny aeraport Navi-Mumbai, Terminał 1 (Indyja)

Terminał 1 aeraporta Navi-Mumbai, jaki adkryŭ svaje dźviery ŭ 2025 hodzie, vyhladaje zvyšsučasna, a dyzajn u formie łotasa nadaje budynku mastackuju vytančanaść. Sieryja hieamietryčnych partałaŭ stvaraje ŭračystuju, amal cyrymanijalnuju atmaśfieru.

U klučavych zonach adpačynku raźmieščany dynamičnyja interaktyŭnyja instalacyi. 

Mižnarodny aeraport Tečo (Pnampień, Kambodža)

Niahledziačy na toje, što hety bujny chab, raźmieščany za 20 kiłamietraŭ na poŭdzień ad Pnampienia, źjaŭlajecca simvałam abnaŭleńnia krainy, svaju nazvu jon atrymaŭ z hłybini historyi — heta tytuł, jaki karol nadavaŭ hierojam jašče 500 hadoŭ tamu.

Asnoŭnaja častka prastory znachodzicca pad masiŭnym naviesam dachu, jaki zabiaśpiečvaje karotkija dystancyi ad zony vysadki da miescaŭ pasadki, a taksama spryjaje lohkaj aryjentacyi. Dyzajn dachu źjaŭlajecca daninaj pavahi vieličnym pałacam i chramam Kambodžy, a ŭnutranyja stoli natchnionyja tradycyjnym mastactvam placieńnia košykaŭ.

Mižnarodny aeraport Pitsburha (ZŠA)

Dziakujučy svajoj maštabnaj linii dachu, jakaja nahadvaje susiednija Alehanskija hory, aeraport Pitsburha staŭ novym znakavym simvałam horada. Architekturnaje rašeńnie arhanična ŭpisvajecca ŭ miascovy łandšaft: 38 stalnych kałon u formie dreŭ pieratvarajuć interjer u padabienstva mietaličnaha lesu.

Prastora, aharodžanaja šklanymi ścienami, zalita naturalnym śviatłom, a čatyry adkrytyja terasy dajuć padarožnikam mahčymaść padychać śviežym pavietram.

Mižnarodny aeraport San-Dyjeha, Terminał 1 (ZŠA)

Terminał 1 samaha zahružanaha ŭ Amierycy aeraporta z adnoj uźlotna-pasadačnaj pałasoj byŭ całkam transfarmavany razam z padjaznymi šlachami, parkoŭkami i multymadalnym transpartnym vuzłom.

Samaja ŭražlivaja jaho detal — vyhnuty šklany fasad daŭžynioj 244 mietry, jaki zabiaśpiečvaje vydatnaje naturalnaje aśviatleńnie i napaŭniaje prastoru śviatłom i pavietram. Adkrytyja terasy vychodziać na zaliŭ, a šmatfunkcyjanalnyja zały čakańnia značna pavyšajuć uzrovień kamfortu ŭsiaho chaba.

Kamientary da artykuła