Zatrymany padazravany ŭ datyčnaści da zabojstva mastaka Skrapieckaha ŭ Polščy
Jon vykarystoŭvaje hruzinski pašpart.
Siamion Skrapiecki
U Polščy zatrymany padazravany ŭ datyčnaści da zabojstva mastaka Siamiona Skrapieckaha. Pra heta paviedamiŭ premjer-ministr krainy Donald Tusk, piša Reform.news
«Padazravany va ŭdziele ŭ zabojstvie rasijanina ŭ Biełaj-Padlašskaj zatrymany lublinskimi palicejskimi i Ahienctvam unutranaj biaśpieki Polščy. Jon vykarystoŭvaje hruzinski pašpart. Ułady pracujuć nad ustanaŭleńniem asoby złačyncy», — napisaŭ jon u sacyjalnaj sietcy X.
Nahadajem, rasijski mastak, viadomy svaimi karykaturami na Pucina, Łukašenku i Kadyrava, byŭ zabity ŭ paniadziełak ranicaj u horadzie Biełaj-Padlašskaj.
U miežach rasśledavańnia spravy zatrymlivalisia dva hramadzianiny Biełarusi va ŭzroście 33 i 37 hadoŭ. Adnak śledstva ŭstanaviła, što jany nie majuć dačynieńnia da złačynstva. Učora stała viadoma, što ich adpuścili paśla dopytu ŭ jakaści śviedak.