Pieršy vypadak Eboły zafiksavali na terytoryi Francyi
Jaho zafiksavali ŭ doktara, jaki viarnuŭsia z Demakratyčnaj Respubliki Konha, paviedamlaje BFMTV sa spasyłkaj na Minzdaroŭja Francyi.
Fota: AP Photo / Jerome Delay, File
U samoj DR Konha takich vypadkaŭ užo bolš za tysiaču.
Lichamanka Eboła — vostraja virusnaja vysokakantehijoznaja chvaroba. Jana paražaje čałavieka, niekatorych prymataŭ, a taksama niekatorych parnakapytnych.
Virus raspaŭsiudžvajecca praz kroŭ abo vadkija vydzialeńni z arhanizmu chvoraha albo pamierłaha čałavieka abo žyvioły. Zarazicca možna nie tolki pry pramym kantakcie z chvorym, ale i praz pradmiety, niadaŭna zabrudžanyja bijałahičnymi vadkaściami. Raspaŭsiudžvańnie chvaroby praz pavietra pamiž prymatami, uklučajučy ludziej, u łabaratornych i naturalnych umovach nie było zafiksavana.
Padčas znachodžańnia ŭ dziaržavach, dzie jość vypadki lichamanki Eboła, u metach prafiłaktyki zaražeńnia rekamiendujecca stroha vykonvać šerah pravił.
Nieabchodna zachoŭvać praviły asabistaj hihijeny (rehularnaje myćcio ruk, vykarystańnie antysieptykaŭ), paźbiahać ciesnych kantaktaŭ ź ludźmi, jakija majuć prykmiety infiekcyjnych zachvorvańniaŭ, vyklučyć kantakty ź dzikimi žyviołami (kažanami, prymatami i inš.), a taksama paźbiahać naviedvańnia miescaŭ ich pražyvańnia.