Ukraina zaklikaje śviet źviarnuć uvahu na zbory vajskovaabaviazanych ŭ Hrodzienskaj vobłaści
Ukraina zaklikaje mižnarodnuju supolnaść zachoŭvać pilnaść u suviazi ź mierapryjemstvami, jakija prachodziać u Hrodzienskaj vobłaści Biełarusi, zajaviŭ ministr zamiežnych spraŭ Ukrainy Andrej Sibiha.
Andrej Sibiha. Fota: MZS Ukrainy
«Z 20 červienia pa 2 lipienia vajskovy kamisaryjat Ašmianskaha rajona rassyłaje pozvy prykładna 2000 vajskovaabaviazanym i stvaraje papiarednija punkty zboru. Choć aficyjna hetyja zachady kłasifikujucca jak rucinnaja pravierka danych, jany słužać taktykaj zapałochvańnia susiednich dziaržaŭ. Kiraŭnictva Biełarusi nie demanstruje namieraŭ adnosna deeskałacyi. Zamiest hetaha Minsk uzmacniaje svaju vajskovuju prysutnaść pablizu miežaŭ Ukrainy i krain NATA», — napisaŭ ministr zamiežnych spraŭ Ukrainy ŭ sacsietcy Ch.
Na dumku Andreja Sibihi, takaja palityka adpaviadaje intaresam Kramla i vykarystoŭvajecca jak instrumient palityčnaha šantažu, što, pavodle acenki ŭkrainskaha ministra, supiarečyć zajavam aficyjnaha Minska ab padtrymcy miru.
Kiraŭnik ukrainskaj dypłamatyi adznačyŭ, što Kijeŭ praciahvaje ŭvažliva sačyć za dziejańniami Biełarusi, papiaredžvaje Minsk nakont niebiaśpieki pahłybleńnia ŭdziełu ŭ rasijskaj ahresii i zaklikaje mižnarodnuju supolnaść uzmacnić cisk na režym Alaksandra Łukašenki.
Raniej Ministerstva abarony Biełarusi paviedamiła, što ŭ Hrodzienskaj vobłaści pravodziacca mabilizacyjnyja mierapryjemstvy z udziełam vajskovych kamisaryjataŭ. Vajskovaabaviazanych hramadzian vyklikajuć na zbornyja punkty dla pravierki i abnaŭleńnia ŭlikovych danych.