Francuzy zatrymali čarhovy tankier rasijskaha cieniavoha fłotu
Vajskova-marskija siły Francyi zatrymali ŭ Mižziemnym mory kala bierahoŭ Sicylii naftavy tankier Deliver, jaki zachodnija krainy ličać častkaj rasiejskaha «cieniavoha fłotu». Pa infarmacyi francuzskich uładaŭ, sudna było zatrymana za parušeńni mižnarodnaha marskoha prava.
Skrynšot ź videa
Prezident Francyi Emanuel Makron zajaviŭ, što hetaja apieracyja demanstruje rašučaść jeŭrapiejskich krain supraćstajać schiemam, jakija dazvalajuć Rasii abychodzić mižnarodnyja sankcyi. Pavodle jaho słoŭ, Jeŭropa nie źbirajecca dazvalać vykarystańnie «cieniavoha fłotu» dla finansavańnia rasijskich vajennych dziejańniaŭ.
Zhodna z danymi servisu adsočvańnia sudnaŭ, tankier Deliver chodzić pad ściaham Kamieruna. U pačatku červienia jon vyjšaŭ z rasijskaha porta Prymorsk i nakiroŭvaŭsia ŭ Sinhapur.
Heta ŭžo nie pieršy vypadak zatrymańnia sudnaŭ, jakija źviazvajuć z rasijskim «cieniavym fłotam». Za apošni čas Francyja razam z sajuźnikami pravodziła anałahičnyja apieracyi suprać niekalkich tankieraŭ. U niekatorych vypadkach paśla pravierak abo vypłaty štrafaŭ sudny adpuskali.
Pavodle acenak zachodnich krain, rasijski «cieniavy fłot» naličvaje bolš za 700 tankieraŭ. Takija sudny časta vykarystoŭvajuć zabłytanuju strukturu ŭłasnaści, rehistrujucca pad ściahami roznych dziaržaŭ i źmianiajuć maršruty, kab abychodzić abmiežavańni na ekspart rasiejskaj nafty.
Paśla papiarednich zatrymańniaŭ niekatoryja tankiery pačali mianiać svaje maršruty, kab paźbiehnuć uzmocnienaha kantrolu. Padobnyja miery suprać sudnaŭ «cieniavoha fłotu» raniej prymali taksama Vialikabrytanija, Bielhija, ZŠA, Estonija i inšyja krainy Zachadu.
Čytajcie taksama:
Tramp: Armuzski praliŭ budzie całkam adkryty ŭ bližejšyja adzin-dva dni
U pralivie Ła-Manš ruski vajskovy karabiel ustupiŭ u kanflikt z brytanskaj jachtaj
Brytanija pierachapiła sudna rasijskaha «cieniavoha fłotu» ŭ Ła-Manšy