Sandu: Padčas pieramoŭ Rasii i Ukrainy pavinna być pastaŭlena pytańnie ab vyvadzie rasijskich vojskaŭ z Prydniastroŭja
Prezidentka Małdovy Maja Sandu zajaviła, što ŭ vypadku mahčymych pieramoŭ ab zaviaršeńni vajny va Ukrainie Jeŭrapiejski sajuz moh by taksama pastavić pytańnie mirnaha vyvadu rasijskich vajskoŭcaŭ z Prydniastroŭja. Pavodle jaje słoŭ, hetaja tema zastajecca adnym z pryjarytetaŭ dla Kišyniova ŭ dyjałohu ź jeŭrapiejskimi partniorami.
Prezident Małdovy Maja Sandu nazvała ŭdary pa cyvilnaj infrastruktury vajennym złačynstvam Rasii. Fota: AP Photo / Vadim Ghirda
Maja Sandu padkreśliła, što Prydniastroŭje źjaŭlajecca častkaj Małdovy, a znachodžańnie rasijskaha vajskovaha kantynhientu ŭ rehijonie, na jaje dumku, nie maje zakonnych padstaŭ. Jana adznačyła, što hetaje pytańnie rehularna ŭzdymajecca padčas kantaktaŭ z pradstaŭnikami ES.
Prydniastroŭje faktyčna adździaliłasia ad Małdovy ŭ 1990 hodzie. Uzbrojeny kanflikt pamiž bakami zaviaršyŭsia ŭ 1992 hodzie paśla padpisańnia pahadnieńnia ab spynieńni ahniu, ale status rehijona dahetul zastajecca niavyrašanym.
Zaraz u Prydniastroŭi znachodzicca kala 1,5 tysiačy rasijskich vajskoŭcaŭ. Aficyjna jany nibyta ŭdzielničajuć u miratvorčaj apieracyi i kantralujuć vykanańnie režymu spynieńnia ahniu ŭ adpaviednaści z pahadnieńniem ad 21 lipienia 1992 hoda.
Razam z tym pieramovy pa ŭrehulavańni vajny va Ukrainie zastajucca faktyčna prypynienymi, a Rasija i ŭłady Prydniastroŭja nieadnarazova zajaŭlali, što nie razhladajuć mahčymaść vyvadu rasijskaha kantynhientu.
Raniej sakratar Rady biaśpieki Rasii Siarhiej Šajhu abvinavaciŭ Kišynioŭ u sprobach abvastryć situacyju vakoł Prydniastroŭja i vycieśnić rasijskija vojski z rehijona. U svaju čarhu, kiraŭnik źniešniepalityčnaha viedamstva niepryznanaj Prydniastroŭskaj Małdaŭskaj Respubliki Vital Ihnaćjeŭ śćviardžaŭ, što rasijskija miratvorcy zastanucca ŭ rehijonie niezaležna ad dalejšaha losu pahadnieńnia ab miratvorčaj misii. Kreml taksama zaklikaŭ małdaŭskija ŭłady aściarožna vykazvacca pa hetaj temie.
Čytajcie taksama:
Jeŭrasajuz adkryŭ pieramovy ab ustupleńni Ukrainy i Małdovy
Łukašenka zaklikaŭ Małdovu «nie rezać pupavinu» i nie hublać raniejšych partnioraŭ
Pucin padpisaŭ ukaz ab razdačy pašpartoŭ žycharam Prydniastroŭja