Litva pasłała ratavalnikaŭ u Vieniesuełu, Biełaruś — nie
Bolš za 2000 ratavalnikaŭ z 27 krain śvietu pryjechali ŭ Vieniesuełu dla pošuku ludziej pad zavałami paśla dvuch razburalnych ziemlatrusaŭ, jakija adbylisia 25 červienia. Niahledziačy na ciesnuju družbu Alaksandra Łukašenki z byłymi lidarami Vieniesueły, jon abmiežavaŭsia nakiravańniem spačuvańniaŭ.
Fota: WFP / Gustavo Vera
Maštabnaja humanitarnaja apieracyja prachodzić pry padtrymcy i kaardynacyi Arhanizacyi Abjadnanych Nacyj.
Ahułam zadziejničany 2245 śpiecyjalistaŭ i 140 pošukavych sabak, ich zadača — pošuk i vyzvaleńnie ludziej z-pad abłomkaŭ budynkaŭ, akazańnie pieršaj miedycynskaj dapamohi.
27 krain prysłali svaich vajskovych i cyvilnych śpiecyjalistaŭ — dapamohu nakiravali Hiermanija, Čechija, Ispanija, ZŠA, Francyja, Italija, Vialikabrytanija, Turcyja, krainy Łacinskaj Amieryki i Blizkaha Uschodu.
Taksama siarod ich Litva, jakaja dasłała ŭ Vieniesuełu dźvie kamandy: ratavalnikaŭ (20 pažarnych, 2 kinołahi i 2 miedyki), a taksama miedycynskuju hrupu z 15 daktaroŭ i 5 łahistaŭ, jakija zabiaśpiečvajuć pracu miedykaŭ. Razam ź imi dastaŭlena 6 ton pošukavaha abstalavańnia i 20 ton humanitarnaha i miedycynskaha hruzu.
Alaksandr Łukašenka nakiravaŭ «samyja ščyryja słovy padtrymki ŭsim žycharam Vieniesueły, asabliva achviaram biaźlitasnaj stychii, chto straciŭ blizkich, zastaŭsia biez prytułku».
Čytajcie taksama:
U Vieniesuele vyratavali 60‑hadovuju žančynu paśla 86 hadzin pad zavałami
U Vieniesuele 11‑hadovaha chłopčyka žyvoha dastali z-pad zavałaŭ praz 70 hadzin paśla ziemlatrusu
Kolkaść achviar ziemlatrusu ŭ Vieniesuele pieravysiła 1400 čałaviek