Rybakoŭ u AAN nazvaŭ ukrainskim bieśpiłotnik, jaki ŭdaryŭ pa aŭtobusie ŭ Branskaj vobłaści
Pavodle jaho słoŭ, heta byŭ BPŁA «Darts».
Bieśpiłotnik typu Darts, ilustracyjnaje fota
Pastajanny pradstaŭnik Biełarusi pry AAN Valancin Rybakoŭ učora na pasiadžeńni Rady biaśpieki AAN, pryśviečanym atacy na biełaruski aŭtobus u Branskaj vobłaści Rasii, nazvaŭ typ vykarystanaha bieśpiłotnika. Pavodle jaho słoŭ, heta byŭ BPŁA ŭkrainskaj vytvorčaści, piša Reform.news.
«Siońnia ŭ nas jość dokazy, kab adkazna zajavić: ataka na biełaruski aŭtobus była ździejśnienaja ŭdarnym BPŁA ŭkrainskaj vytvorčaści. Hety BPŁA naležyć da typu Darts i abstalavany paražalnymi elemientami. Jon maje bajavuju častku z masaj vybuchovaha rečyva kala 1200 h u traciłavym ekvivalencie», — skazaŭ jon.
Rybakoŭ adznačyŭ, što na miescy zdareńnia byli kanfiskavanyja pradmiety z markiroŭkaj na ŭkrainskaj movie.
«Padčas ahladu miesca zdareńnia byli kanfiskavanyja pradmiety z markiroŭkami na ŭkrainskaj movie. Siarod ich — błok kiravańnia detanataram, vyrableny na zavodzie ŭ Šostcy Sumskaj vobłaści. Sam detanatar, a taksama akumulatarnaja batareja źjaŭlajucca kampanientami, vyrablenymi va Ukrainie», — skazaŭ jon.
Razam z tym pastajanny pradstaŭnik Biełarusi nie paviedamiŭ, chto mienavita atakavaŭ aŭtobus.
Jon asudziŭ udar, nazvaŭšy jaho pravakacyjaj, nakiravanaj na eskałacyju kanfliktu i ŭciahvańnie Biełarusi va ŭzbrojeny kanflikt pamiž Rasijaj i Ukrainaj. Rybakoŭ padkreśliŭ, što adsutnaść chutkaj i žorstkaj reakcyi z boku Minska nie varta rasceńvać jak prajavu słabaści, nierašučaści abo bajaźlivaści.
Incydent ź biełaruskim aŭtobusam zdaryŭsia 17 červienia ŭ Branskaj vobłaści.
Tady byŭ paškodžany aŭtobus, jaki pieravoziŭ dziaciej z futbolnaj kamandy dziciača-junackaj spartyŭnaj škoły №2 horada Rečycy, a taksama navučencaŭ pryvatnaj tancavalnaj studyi. Rasijskija ŭłady śćviardžali, što ŭdar byŭ nibyta naniesieny ŭkrainskim bieśpiłotnikam.
U vyniku zdareńnia zahinuła žančyna, jakaja supravadžała hrupu dziaciej i była žonkaj treniera kamandy. Jašče vosiem čałaviek, u tym liku šaściora dziaciej, atrymali traŭmy roznaj stupieni ciažkaści. Ich usich adrazu pieravieźli ŭ Biełaruś.