Niderłandy — fienomien čempijanataŭ śvietu. 16 hadoŭ biez paražeńniaŭ — i nivodnaha finału

Zbornaja Niderłandaŭ vybyła z čempijanatu śvietu — 2026 užo na stadyi 1/16 finału. Kamanda sastupiła Maroka ŭ sieryi paślamatčavych pienalci.

Kodzi Hakpa adkryŭ lik u sustrečy z Maroka, ale kamanda nie zmahła pieramahčy, fota fifa.com

Taki vynik ciažka nazvać siensacyjaj: marakancy zajmajuć vyšejšaje miesca ŭ rejtynhu FIFA i amal nie sastupali niderłandcam ni pavodle acenak Opta, ni pavodle kaeficyjentaŭ bukmiekieraŭ. Ale ŭsio roŭna heta vyhladaje niespraviadliva ŭ dačynieńni da kamandy Ronałda Kumana, bo jana znoŭ pakinuła čempijanat śvietu, nie prajhraŭšy nivodnaha matča ŭ hulniavy čas, piša sports.ru.

Pačynajučy ź finału ČS-2010, Niderłandy ni razu nie sastupili ni ŭ asnoŭny, ni ŭ dadatkovy čas. Hetaja sieryja ŭžo naličvaje 16 matčaŭ — absalutny rekord turniru.

Papiaredniaje dasiahnieńnie naležała Brazilii Piele — 13 matčaŭ biez paražeńniaŭ u 1958—1966 hadach. Paradoks u tym, što brazilcy za hety pieryjad dvojčy stali čempijonami śvietu, a Niderłandy z 2010 hoda navat nie dajšli da finału.

Najlepšy vynik — bronzavyja miedali ŭ 2014 hodzie. Čempijanat śvietu 2018 hoda jany ŭvohule prapuścili.

Kali ž uličvać tolki asnoŭny čas, sieryja jašče daŭžejšaja. Apošni raz Niderłandy prajhrali na čempijanacie śvietu 20 hadoŭ tamu — 0:1 Partuhalii ŭ lehiendarnym matčy, jaki ŭvajšoŭ u historyju dziakujučy 16 žoŭtym i čatyrom čyrvonym kartkam.

Adsiul vynikaje jašče adzin niesuciašalny rekord. Niderłandy — pieršaja zbornaja ŭ historyi, jakaja čatyry razy zapar vybyła z čempijanatu śvietu, nie prajhraŭšy nivodnaha matča.

Akramia taho, heta adzinaja kamanda, jakaja maje sieryju z 23 matčaŭ biez paražeńniaŭ na čempijanatach śvietu i pry hetym nie zavajavała nivodnaha tytuła.

Paślamatčavyja pienalci — asobnaja historyja. Ź piaci sieryj na turniry niderłandcy prajhrali čatyry. Adzinaja pieramoha była ŭ čverćfinale ČS-2014 suprać Kosta-Ryki. Usio astatniaje — rasčaravańnie:

• 1998 — paražeńnie ad Brazilii ŭ paŭfinale (1:1, 2:4 pa pienalci);
• 2014 — paražeńnie ad Arhienciny ŭ paŭfinale (0:0, 2:4 pa pienalci);
• 2022 — paražeńnie ad Arhienciny ŭ čverćfinale (2:2, 3:4 pa pienalci);
• 2026 — paražeńnie ad Maroka ŭ 1/16 finału (1:1, 2:3 pa pienalci).

Pa kolkaści paražeńniaŭ u sieryjach pienalci Niderłandy dahnali Ispaniju — u abiedźviuch zbornych ciapier pa čatyry takija niaŭdačy. U Francyi, Italii i Anhlii — pa try.

Na čempijanat śvietu ŭ Paŭnočnaj Amierycy Niderłandy jechali vośmymi favarytami na zołata i druhimi siarod zbornych, jakija jašče nikoli nie vyjhravali mundyjal. Vyšej aceńvalisia tolki šancy Partuhalii.

Vynik:

• — Pieršaje miesca ŭ hrupie — 53%
• — Vychad u płej-of — 88%
• — Vychad u 1/8 finału — 55%
• — Vychad u 1/4 finału — 35%
• — Čempijonski tytuł — 5%

Prahnozy spraŭdžvalisia roŭna da taho momantu, pakul nie pačałosia samaje hałoŭnaje. Mahčyma, na nastupnym čempijanacie śvietu Niderłandy narešcie prajhrajuć matč — i stanuć čempijonami?

Kamientary da artykuła