Łukašenka pryjechaŭ na vypuskny da Koli ŭ Piekin
Kola Łukašenka skončyŭ sumiesnuju prahramu BDU i Piekinskaha ŭniviersiteta pa bijatechnałohijach.
U stalicy Kitaja adbyłasia ŭračystaja cyrymonija ŭručeńnia dypłomaŭ vypusknikam pieršaj sumiesnaj adukacyjnaj biełaruska-kitajskaj prahramy BDU i Piekinskaha ŭniviersiteta pa śpiecyjalnaści «bijatechnałohija».
Siarod vypusknikoŭ byŭ i Mikałaj Łukašenka, jaki, vyhladaje, staŭ uładalnikam adrazu dvuch dypłomaŭ — biełaruskaha i kitajskaha VNU.
Kali mierkavać pa fota, to tolki 5 čałaviek stali vučniami mienavita hetaj prahramy.
Rektar BDU Andrej Karol taksama pryjechaŭ u Kitaj
Vypuskny Mikałaja staŭ adnoj z pryčyn ciapierašniaha vizitu Alaksandra Łukašenki ŭ Kitaj.
Pierad uračystaj častkaj jon sustreŭsia z kiraŭnictvam Piekinskaha ŭniviersiteta, a taksama vystupiŭ z pramovaj pierad vypusknikami.
«My ŭ Biełarusi chacieli b, kab hetyja prahramy byli hłybokimi i ŭsiebakovymi, kab jany byli praktyka-aryjentavanymi. U advarotnym vypadku navošta heta navučańnie, kali heta nie budzie ŭ poŭnaj miery źviernuta na praktyku i nie budzie prynosić karyść dvum narodam?» — skazaŭ Łukašenka.
Pahadnieńnie ab stvareńni sumiesnaj prahramy bakałaŭryjata pa bijatechnałohijach pamiž BDU i Piekinskim univiersitetam było padpisana ŭ 2022 hodzie, a ŭ lipieni 2025 hoda baki pašyryli supracoŭnictva, zaklučyŭšy anałahičnaje pahadnieńnie ŭžo ŭ miežach mahistratury, nahadvaje REFORM.news.