Kaleśnikava raskazała pra sustreču z dypłamatam, jaki ŭdzielničaŭ u vyzvaleńni palitviaźniaŭ
Maryja Kaleśnikava znachodzicca ź vizitam u ZŠA. Byłaja palitźniavolenaja sustrełasia z namieśnikam pamočnika dziaržaŭnaha sakratara ZŠA pa spravach Uschodniaj Jeŭropy Krysam Śmitam.
Taćciana Chomič, Krys Śmit, Maryja Kaleśnikava i Anton Radniankoŭ, fota pres-słužby Maryi Kaleśnikavaj
Jon źjaŭlajecca adnym z klučavych amierykanskich dypłamataŭ, jakija ŭdzielničajuć u pieramovach z aficyjnym Minskam nakont vyzvaleńnia palityčnych źniavolenych. «Lusterka» pacikaviłasia ŭ Kaleśnikavaj padrabiaznaściami sustrečy i tym, ci varta čakać novaha vizitu amierykanskaj delehacyi ŭ Biełaruś.
Sustreča Maryi Kaleśnikavaj i Krysa Śmita adbyłasia 29 červienia ŭ Vašynhtonie. Na joj taksama prysutničali siastra palityka Taćciana Chomič i člen jaje kamandy Anton Radniankoŭ.
— Krys prarabiŭ vielizarnuju pracu na biełaruskim kirunku. Mienavita pry jaho ŭdziele byŭ raspačaty dyjałoh na vysokim uzroŭni ź biełaruskimi ŭładami, uklučajučy pramyja kantakty z Alaksandram Łukašenkam. Jon nieadnarazova naviedvaŭ Minsk i stajaŭ la vytokaŭ pracesu, jaki praciahvajecca i siońnia, — raskazała Maryja Kaleśnikava ŭ kamientary «Lusterku».
Taksama ŭ jaje spytali, ci abmiarkoŭvałasia padčas sustrečy z Krysam Śmitam pytańnie ab tym, kali adbudziecca nastupny vizit u Minsk amierykanskaj delehacyi na čale sa śpiecyjalnym pradstaŭnikom ZŠA pa Biełarusi Džonam Koŭłam dla pieramoŭ ab vyzvaleńni palityčnych źniavolenych.
— Pierśpiektyva takoha vizitu jość, ale heta niaprosty praces, — adkazała Maryja.
Paśla vizitu ŭ Minsk śpiecpasłańnika ZŠA Džona Koŭła 19 sakavika 2026 hoda na volu vyjšli 250 palitviaźniaŭ. Usiaho pry sadziejničańni ZŠA byli vyzvalenyja bolš za 500 biełaruskich palityčnych źniavolenych.
Krystafier (Krys) Śmit — karjerny amierykanski dypłamat, jaki zajmaje pasadu namieśnika pamočnika dziaržaŭnaha sakratara pa spravach Uschodniaj Jeŭropy. Jon kuryruje adnosiny z Ukrainaj, Małdovaj i Biełaruśsiu. Raniej u Ofisie Śviatłany Cichanoŭskaj Śmita charaktaryzavali jak «samaha paśladoŭnaha partniora ŭ ZŠA», adznačajučy jaho asablivuju rolu ŭ pracesie vyzvaleńnia palityčnych źniavolenych.
Vizit Kaleśnikavaj u ZŠA praciahniecca tydzień. Byłaja palitźniavolenaja płanuje sustrečy z amierykanskimi palitykami, jakija zajmajucca biełaruskim kirunkam, a taksama naviedaje ekśpiertnyja arhanizacyi.
U ramkach pajezdki Kaleśnikava stała stypiendyjatkaj prahramy Kissinger Fellow amierykanskaha Instytuta Makkiejna na 2026—2027 hady. Jak adznačajecca ŭ pres-relizie arhanizacyi, Maryja budzie pracavać nad farmiravańniem adzinaha transatłantyčnaha padychodu da Biełarusi, jaki «spałučaje cisk z prahmatyčnym uzajemadziejańniem i pakidaje adkrytymi kanały tam, dzie jany mohuć prynieści vynik».
Vykanaŭčaja dyrektarka Instytuta Makkiejna doktar Evielin Farkas adznačyła, što «Maryja Kaleśnikava spałučaje ŭ sabie stratehičnuju dalnabačnaść Hienry Kisindžara i mužnaść Džona Makkiejna pierad tvaram vyprabavańniaŭ, a taksama addanaść słužeńniu vyšej za asabistyja intaresy».
— Dla nas vialiki honar padtrymać jaje svoječasovuju pracu pa hetym nadzvyčaj važnym pytańni, — zajaviła Farkas.