U Siejm Litvy ŭnieśli papraŭki pa mihrantach. Jak zaraz treba budzie zdavać ispyt pa litoŭskaj
Prezident Litvy Hitanas Naŭsieda ŭnios u Siejm papraŭki pa mihrantach: ispyt pa litoŭskaj movie dla tych, chto padaje zajavu na treci dakumient na pražyvańnie za 10 hadoŭ (i nie tolki na DNŽ). Što heta aznačaje i kaho zakranie, piša «Vołna».
Siejm Litvy
Učora prezident Litvy Hitanas Naŭsieda ŭnios u Siejm papraŭki da zakona «Ab pravavym stanoviščy zamiežnikaŭ». Siarod prapanoŭ — novy dvuchhadovy farmat dazvołu na časovuju pracu i ekzamien pa litoŭskaj movie dla častki zamiežnikaŭ, jakija atrymlivajuć užo nie pieršy dakumient, što daje prava na pražyvańnie ŭ Litvie.
Pakul heta nie dziejny zakon. Papraŭki jašče pavinny być razhledžany i pryniaty Siejmam. U prajekcie paznačana, što ŭ vypadku pryniaćcia jany pavinny ŭstupić u siłu z 1 studzienia 2027 hoda.
Što mienavita prapanujecca adnosna movy?
U prajekcie jość dźvie roznyja normy.
1. Dla novaha dvuchhadovaha dazvołu na časovuju pracu prapanujecca abaviazkovaje paćviardžeńnie viedańnia litoŭskaj movy na ŭzroŭni A2.
Zamiežnik pavinien pradstavić dakumient, jaki paćviardžaje vałodańnie litoŭskaj movaj nie nižej za ŭzrovień A2.
Adnak heta datyčycca nie ŭsich, a tolki tych, dla kaho zapytvajemy dazvoł na časovuju pracu stanie ŭžo trecim dakumientam, jaki daje prava žyć u Litvie, za apošnija 10 hadoŭ (naprykład, nacyjanalnaja viza D taksama budzie ličycca adnym z troch dakumientaŭ).
2. Dla častki dazvołaŭ na žycharstva (DNŽ) prapanujecca patrabavańnie viedańnia litoŭskaj movy na ŭzroŭni B1.
Zamiežnik, jaki prosić vydać časovy DNŽ pavodle punktaŭ 4 abo 6 častki 1 artykuła 40 zakona, pavinien pradstavić dakumient, jaki paćviardžaje vałodańnie litoŭskaj movaj nie nižej za ŭzrovień B1.
- Punkt 40(1)(4) — časovy DNŽ dla pracy ŭ Litvie.
- Punkt 40(1)(6) — časovy DNŽ dla navučańnia ŭ Litvie.
Takim čynam, pavodle tekstu prajekta, ekzamien pa litoŭskaj movie na ŭzroŭni B1 prapanujecca dla tych, chto padaje zajavu na pracoŭny abo studencki DNŽ i pry hetym atrymlivaje ŭžo treci dakumient na pražyvańnie ŭ Litvie za apošnija 10 hadoŭ.
Ekzamieny A2 abo B1, pavodle prapanavanych papravak, buduć patrabavacca ŭ troch vypadkach:
- pry atrymańni zvyčajnaha pracoŭnaha VNŽ — kali heta treci dakumient na pražyvańnie za apošnija 10 hadoŭ;
- pry atrymańni studenckaha VNŽ — kali heta treci dakumient na pražyvańnie za apošnija 10 hadoŭ;
- pry atrymańni novaha dvuchhadovaha dazvołu na časovuju pracu — taksama kali heta treci dakumient, ale patrabavany ŭzrovień movy — A2.
Kaho hetaja norma, pavodle prajekta, nie zakranaje
- uładalnikaŭ Blue Card, pakolki jana vydajecca pavodle asobnaha punkta zakona — 40(1)(4¹), jaki ŭ prajekcie nie zhadvajecca;
- asob, jakija znachodziacca ŭ Litvie pa humanitarnych padstavach, z-za niemahčymaści viartańnia, atrymali dadatkovuju abaronu i ŭ inšych padobnych vypadkach — jany rehulujucca inšymi punktami artykuła 40;
- tych, chto atrymlivaje VNŽ pa ŭźjadnańni siamji, litoŭskim pachodžańni abo inšych padstavach, jakija taksama nie nazvany ŭ hetaj normie.
Praduhledžany vyklučeńni
Patrabavańnie ab paćviardžeńni viedańnia litoŭskaj movy nie pavinna raspaŭsiudžvacca na:
- dziaciej;
- asob, starejšych za 65 hadoŭ;
- ludziej z ustanoŭlenym uzroŭniem pracazdolnaści ad 0 da 55 %;
- asob, jakim vyznačana patreba ŭ indyvidualnaj dapamozie;
- ludziej ź ciažkimi chraničnymi psichičnymi i pavodzinskimi razładami.