U Vieniesuele mužčyna pravioŭ paśla ziemlatrusu pad zavałami 8 dzion. Jaho ŭratavała vartavaja budka

U Vieniesuele vyratavalniki dastali z-pad zavałaŭ 43‑hadovaha mužčynu, jaki pravioŭ tam paśla mocnaha ziemlatrusu vosiem dzion, paviedamlaje Associated Press.

Fota: AP

Jak paviedamlajecca, Ernan Albierta Chil Fłores z 24 červienia znachodziŭsia pad ruinami handlovaha centra ŭ prybiarežnym horadzie Ła-Huajra. Padčas ziemlatrusu jon byŭ na dziažurstvie i znachodziŭsia ŭ vartavoj budcy. Mienavita jana abaraniła jaho ad śmiarotnych traŭmaŭ i stvaryła pavietranuju prastoru, jakaja dazvoliła mužčynu vyžyć.

Vyratavańnie hetaha čałavieka stała vielmi redkim vypadkam, bo zvyčajna šancy znajści žyvych pad zavałami rezka źmianšajucca ŭžo praz 48—72 hadziny paśla stychijnaha biedstva. U hetym vypadku vyžyć mužčynu dapamahło toje, što vyratavalniki zdoleli padtrymlivać ź im suviaź i pieradavali jamu vadu i ježu. Dziakujučy hetamu mužčyna zmoh pražyć pad zavałami značna daŭžej, čym heta zvyčajna ličycca mahčymym.

Vyratavalnaja apieracyja praciahvajecca. Pošuki ludziej pad zavałami ciapier viaducca ŭ maksimalnaj cišyni, kab možna było pačuć mahčymyja sihnały ab dapamozie. Unačy vyratavalniki taksama sočać za lubymi śvietłavymi sihnałami.

Pavodle apošnich aficyjnych źviestak, kolkaść zahinułych u vyniku ziemlatrusaŭ u Vieniesuele ŭzrasła da 2295 čałaviek.

Dva mahutnyja ziemlatrusy mahnitudaj 7,2 i 7,5 adbylisia ŭ krainie 24 červienia. Jany stali adnymi z najmacniejšych u Vieniesuele za apošniaje stahodździe.

Kamientary da artykuła