«Jachtu Pucina» pierahnali ŭ Sievieramorsk. Mahčyma, jaje ratujuć ad ukrainskich bieśpiłotnikaŭ

82‑mietrovaja supierjachta «Hrejsfuł» (jakuju paśla pačatku vajny pieranazvali ŭ «Kasatku»), źviazanaja z prezidentam Rasii Uładzimiram Pucinym, ciapier znachodzicca ŭ porcie Sievieramorska kala Murmanska. Pra heta paviedamiła dackaja radyjoviaščalnaja karparacyja DR, spasyłajučysia na spadarožnikavyja zdymki ad 5 lipienia.

Skryn videa

Razam ź jachtaj u port prybyŭ vajenny karabiel supravadžeńnia «Vajavoda», jaki išoŭ z adklučanym transponderam — jaho nienadoŭha ŭklučyli tolki za 70 kiłamietraŭ ad Sievieramorska.

Naprykancy červienia hety kanvoj zaŭvažyli kala ŭźbiarežža Danii. Tady ekipaž pieradaŭ aficyjnaje paviedamleńnie, što sudna nibyta nakiroŭvajecca ŭ Stambuł, adnak paśla hetaha karabli prajšli ŭzdoŭž Narviehii ŭ rasijskija paŭnočnyja vody.

Ekśpierty ličać, što evakuacyja jachty na Poŭnač źviazanaja sa sprobaj abaranić jaje ad atak ukrainskich bieśpiłotnikaŭ, jakija rehularna dalatajuć da paŭdniovych rehijonaŭ Rasii.

Da hetaha «Hrejsfuł» nieadnarazova bačyli ŭ Sočy padčas vizitaŭ tudy Pucina. Košt sudna aceńvajecca ŭ 100—120 miljonaŭ dalaraŭ — jachta ličycca druhoj pa pamiery jachtaj rasijskaha prezidenta paśla 140‑mietrovaj «Šachierezady».

Kamientary da artykuła