U Polščy rasijaninu, jaki vydavaŭ siabie za apazicyjaniera, dali siem hadoŭ kałonii za pracu na FSB. Jaho žonka taksama atrymała termin
Ich pryznali vinavatymi ŭ pracy na FSB.
Akruhovy sud Sasnaŭca 9 lipienia asudziŭ rasijskaha apazicyjaniera Ihara Rohava da siami hadoŭ pazbaŭleńnia voli, a jaho žonku Irynu — da troch hadoŭ.
Ich pryznali vinavatymi ŭ pracy na FSB, piša «Vot Tak».
Surovy prysud Rohavu tłumačycca surjoznymi abvinavačvańniami: jaho pryznali vinavatym u špijanažy i ŭdziele ŭ adpraŭcy pasyłki z vybuchoŭkaj. Iryna Rahova była pryznana vinavataj u sadziejničańni i padbuchtorvańni da špijanažu.
Sudy nad rasijanami prachodzili ŭ zakrytym dla presy režymie.
Pavodle viersii śledstva, ź lutaha pa žnivień 2022 hoda Rohaŭ supracoŭničaŭ z FSB — źbiraŭ infarmacyju pra pradstaŭnikoŭ rasijskaj apazicyi, jakija pražyvajuć u Polščy, a taksama pra ludziej i arhanizacyi, jakija im dapamahajuć.
Śledstva ličyć, što mužčyna pieradavaŭ sabranyja danyja žoncy na zašyfravanym elektronnym nośbicie, a jana pierasyłała ich supracoŭnikam FSB u Rasii.
Taksama, pavodle infarmacyi prakuratury, u lipieni 2024 hoda Rohaŭ razam z dvuma hramadzianami Ukrainy i adnym hramadzianinam Rasii ŭdzielničaŭ u adpraŭcy pasyłki ź niebiaśpiečnym hruzam i arhanizacyi jaje atrymańnia.
Śledstva śćviardžaje, što ŭ adpraŭleńni znachodzilisia ŭzryŭnyja pryłady i materyjały, uklučajučy nitrahliceryn. Pasyłku kanfiskavali na składzie kurjerskaj słužby da taho, jak jana była dastaŭlena adrasatu.