U Biełarusi navučylisia ramantavać ciepłasietki biez adklučeńnia aciapleńnia
Śpiecyjalisty «Minskkamunciepłasietki» aprabavali novuju technałohiju.
Pradpryjemstva «Minskkamunciepłasietka» ŭpieršyniu ŭ Biełarusi ździejśniła zamienu ŭčastka ciepłavych sietak biez adklučeńnia spažyŭcoŭ ad ciepłavoj enierhii na vuł. Šaranhoviča 9 lipienia, pieradaje «Minsk-Naviny».
Jak patłumačyŭ pieršy namieśnik dyrektara — hałoŭny inžynier pradpryjemstva Hienadź Łukaševič, padobnyja technałohii ŭžo niekalki hadoŭ vykarystoŭvaje «MINHAZ», śpiecyjalisty jakoha akazvajuć techničnuju padtrymku rabotnikam «Minskkamunciepłasietki».
Adnak zamiena takim čynam znošanych trubapravodaŭ, jakija niasuć vadziany ciepłanośbit, pravodzicca ŭ krainie ŭpieršyniu.
— Haz i ciepłanośbit — heta absalutna roznyja asiarodździ, — raspavioŭ dyrektar «Minskkamunciepłasietki» Andrej Viračkin. — Ale my vyrašyli aprabavać dadzienuju technałohiju na ciepłavych sietkach. Usie pytańni piłotnaha prajekta prapracoŭvalisia vielmi surjozna. I zadača była vykanana paśpiachova. Chaču adznačyć, što vykanańnie rabot biez adklučeńnia spažyŭcoŭ asabliva aktualna ŭ aciaplalny siezon, kali patrabujecca pravieści padklučeńnie novych spažyŭcoŭ albo vypravić avaryjnuju situacyju. Prymianieńnie dadzienaj technałohii dazvalaje vykonvać raboty tak, kab minčanie nie adčuvali dyskamfortu.