Takoha dziciačaha sadka vy jašče nie bačyli. Jaho sprajektavaŭ łaŭreat «architekturnaha Nobiela»

Na terytoryi Miunchienskaha techničnaha ŭniviersiteta pabudavali dziciačy sadok ź niezvyčajnaj płaniroŭkaj. Z-za nievialikaha ŭčastka architektary raźmiaścili hulniavuju placoŭku nie ŭ dvary, a na troch pavierchach budynka, a ich złučyli horkami.

Vizualizacyja prajekta dziciačaha sadka Miunchienskaha techničnaha ŭniviersiteta, padrychtavanaja studyjaj Kéré Architecture. Fota: kerearchitecture.com

Dziciačy sadok Kinderoase («Dziciačy aazis»), raźličany na 60 dziaciej supracoŭnikaŭ i studentaŭ Miunchienskaha techničnaha ŭniviersiteta, pavinien dapamahčy baćkam lahčej spałučać pracu abo vučobu z dohladam dziaciej.

Prajekt raspracavała bierlinskaja studyja Kéré Architecture pad kiraŭnictvam architektara Dyjebieda Fransisa Kiere. Uradženiec Burkina-Faso, jaki ŭžo šmat hadoŭ žyvie i pracuje ŭ Hiermanii, u 2022 hodzie staŭ łaŭreatam Premii Pryckiera — samaj prestyžnaj uznaharody ŭ architektury.

Pakoj dla cichaha adpačynku. Vizualizacyja: Kéré Architecture

Budynak uźviali na miescy byłoj parkoŭki kala ŭniviersiteckaj kaviarni. Nievialiki ŭčastak prymusiŭ architektaraŭ admovicca ad zvykłaj płaniroŭki dziciačaha sadka i raźvivać prajekt nie ŭšyrki, a ŭ vyšyniu.

Schiema trochuzroŭnievaj viertykalnaj hulniavoj prastory ŭ dziciačym sadku. Vizualizacyja: Kéré Architecture

U vyniku źjaviŭsia piacipaviarchovy budynak płoščaj kala 1540 kvadratnych mietraŭ, hałoŭnaj admietnaściu jakoha stała trochuzroŭnievaja hulniavaja placoŭka sa źjezdami pamiž pavierchami. Pavodle aŭtaraŭ prajekta, jany imknulisia pahladzieć na budynak vačyma dziaciej. Hulniavyja zony i horki pavinny zaachvočvać daśledavać prastoru, ruchacca i prydumlać ułasnyja scenaryi hulniaŭ.

Fota: archdaily.com

Asnoŭnym budaŭničym materyjałam stała dreva. Heta dazvalaje źmienšyć vuhlarodny śled budynka. Bieton vykarystali tolki dla padmurka i evakuacyjnaj leśvicy, a fasad azdobili drevam i łamielami z kortenaŭskaj stali.

Fota: archdaily.com

Jašče adnoj prablemaj stała raźmiaščeńnie pobač z ažyŭlenaj vulicaj. Hulniavuju placoŭku i dapamožnyja pamiaškańni vynieśli na bok darohi — jany słužać svojeasablivym akustyčnym barjeram. A pakoi dla zaniatkaŭ i adpačynku, dzie važnaja cišynia, raźmiaścili z procilehłaha boku.

Vizualizacyja: Kéré Architecture

Na pieršym paviersie znachodziacca pryjomnaja i administracyjnyja pamiaškańni. Dziciačyja hrupy raźmierkavanyja pa pavierchach u zaležnaści ad uzrostu. Akramia pakojaŭ dla zaniatkaŭ, u budynku jość ahulnyja prastory dla hulniaŭ, spartyŭnaja zała i stałovaja. U interjerach pieravažajuć naturalnaje dreva i jarkija kalarovyja elemienty.

Fota: kerearchitecture.com

Na dachu ŭładkavali častkova krytuju terasu z hulniavoj zonaj, adkul adkryvajecca panaramny vid na horad. Padčas raspracoŭki prajekta architektary taksama prapanavali złučyć terasu z dacham susiedniaj ŭniviersiteckaj kaviarni pry dapamozie horki, kab stvaryć supolnuju prastoru, dzie zmohuć sustrakacca dzieci, studenty i supracoŭniki ŭniviersiteta.

Jak adznačajecca na sajcie architekturnaj studyi Kéré Architecture, pry raspracoŭcy prajekta asablivuju ŭvahu nadali enierhaefiektyŭnaści, kamfortnaj tempieratury ŭ pamiaškańniach, pažarnaj biaśpiecy i abaronie ad šumu. Architektary imknulisia stvaryć prastoru, jakaja spryjaje dziciačaj tvorčaści i adnačasova zabiaśpiečvaje kamfort dziakujučy ekałahičnamu padychodu da budaŭnictva.

Ale hałoŭnaje navatarstva — sadok upisany ŭ pracoŭnyja budynki ŭniviersiteta. Ciapier baćkam nie treba asobna daloka jechać, kab addać dzicia. Pryjechaŭ — dzicia pakinuŭ — pajšoŭ rabić. Na abied pajšoŭ i pajeŭ razam z małym. Paśla jon zastaŭsia paspać, a ty viartaješsia da raboty.

Kamientary da artykuła