U Rečyckim rajonie znajšli na ŭčastku patrony Druhoj suśvietnaj vajny
Žychar ahraharadka Karavacičy Rečyckaha rajona padčas ziemlanych rabot na svaim učastku znajšoŭ patrony časoŭ Druhoj suśvietnaj vajny, paviedamiŭ Dziaržaŭny kamitet sudovych ekśpiertyz.
Mužčyna sabraŭ znachodku, akuratna skłaŭ jaje ŭ haražy i płanavaŭ paźniej razabracca, što ź joj rabić, ale paśla zabyŭsia pra heta. Tolki praz paŭhoda jon uspomniŭ pra niebiaśpiečnyja pradmiety i źviarnuŭsia da siłavikoŭ.
Supracoŭniki milicyi kanfiskavali bojeprypasy i nakiravali ich na balistyčnuju ekśpiertyzu. Śpiecyjalisty vyznačyli, što ŭsie patrony byli vyrablenyja pramysłovym sposabam i źjaŭlajucca sapraŭdnymi bojeprypasami dla vintovak kalibru 7,92 mm sistemy Mauser i madernizavanych vintovak 7,5 mm sistemy Lebel.
Karavacičy ŭ hady Druhoj suśvietnaj vajny stali miescam ciažkich bajoŭ. U žniŭni 1941 hoda vioska była akupavanaja niamieckimi vojskami, a ŭ listapadzie 1943 hoda padčas Homielska-Rečyckaj nastupalnaj apieracyi tam adbyłosia bujnoje tankavaje sutyknieńnie. U bajach udzielničali tanki, artyleryja i piachotnyja padraździaleńni, a paśla ich zastałosia šmat zbroi i bojeprypasaŭ, jakija da hetaha času znachodziać miascovyja žychary.
Ekśpierty nahadvajuć: pry znachodžańni patronaŭ, zbroi abo inšych padobnych pradmietaŭ nieabchodna adrazu paviedamlać u milicyju. Niezakonnaje zachoŭvańnie abo abychodžańnie z ahniastrelnaj zbrojaj, bojeprypasami i vybuchovymi rečyvami moža pryvieści da kryminalnaj adkaznaści.
Čytajcie taksama:
U milicyi zaklikali biełarusaŭ nie nabyvać rasijskich revalvieraŭ
U kobrynskaha piensijaniera znajšli samarobny revalvier z bojeprypasami
U Homieli piensijanier paŭstahodździa zachoŭvaŭ revalvier uzoru 1895 hoda. Na jaho danios syn