Padčas pažaru ŭ ałžyrskim dziciačym domie zahinuli bolš za dziesiać čałaviek

U noč na 16 lipienia ŭ dziciačym domie, raźmieščanym u kamunie Machamiedyja na ŭschodzie stalicy Ałžyra, adbyŭsia mocny pažar. Pavodle apošnich danych słužby hramadzianskaj abarony krainy, u vyniku trahiedyi zahinuli nie mienš za 11 čałaviek, jašče 19 atrymali ranieńni. Uzrost zahinułych pakul nie paviedamlajecca, piša Euronews.

Fota: RYAN MERCER/AP

Pieršyja padraździaleńni ratavalnikaŭ prybyli na miesca zdareńnia kala treciaj hadziny nočy. Dla likvidacyi pažaru byli zadziejničanyja šeść pažarnych aŭtamabilaŭ, šeść mašyn chutkaj dapamohi, a taksama śpiecyjalnaje padraździaleńnie dla pracy ŭ ciažkadastupnych miescach, abstalavanaje aŭtadrabinaj.

Spačatku paviedamlałasia pra 16 paciarpiełych, jakija atrymali apioki, atručvańnie praduktami hareńnia i ciažkaści z dychańniem. Paźniej infarmacyja była ŭdakładnienaja: kolkaść zahinułych pavialičyłasia da 11 čałaviek, a paciarpiełych — da 19. Nie vyklučajecca, što kolkaść achviar moža jašče bolš pavialičycca.

Pavodle apošnich źviestak, dziesiać čałaviek atrymali apioki roznaj stupieni ciažkaści, dvoje paciarpieli ad prablem z dychańniem, jašče siamiora znachodziacca ŭ stanie psichałahičnaj traŭmy paśla pieražytaha.

Ratavalniki taksama evakujavali piać čałaviek ź invalidnaściu i dastavili ich u biaśpiečnaje miesca.

Premjer-ministr Ałžyra Sifi Hryb naviedaŭ paciarpiełych u śpiecyjalizavanym apiokavym centry ŭ Zieraldzie, a zatym pabyvaŭ va ŭniviersiteckaj balnicy Mustafa Paša, dzie taksama znachodziacca paciarpiełyja.

U apošnija dni Ałžyr pakutuje ad anamalnaj śpioki. Na hetym fonie tolki za adzin tydzień u roznych rehijonach krainy ŭźnikła kala tysiačy pažaraŭ. Pryčyny ŭzharańnia ŭ dziciačym domie pakul vyśviatlajucca. 

Kamientary da artykuła