Endzi Biornem abvieščany novym lidaram Lejbarysckaj partyi i zojmie pasadu premjera Vialikabrytanii
Biornem źmianiaje na hetaj pasadzie Kira Starmiera, jaki niadaŭna pajšoŭ u adstaŭku.
Fota: AP Photo / Jon Super
Biornem — mer Vialikaha Mančestera, jamu 56 hadoŭ. Paśla zakančeńnia ŭniviersiteta Biornem pracavaŭ daradcam lejbarysckich palitykaŭ, a taksama supracoŭnikam Nacyjanalnaj słužby achovy zdaroŭja. Kali ŭ 2001 hodzie jaho abrali ŭ Pałatu hramadaŭ ad akruhi Li ŭ Vialikim Mančestery, jon byŭ adnym z mnohich maładych deputataŭ, jakija pryjšli ŭ parłamient na chvali papularnaści Toni Błera.
U 2017 hodzie jon pakinuŭ parłamient i vyłučyŭsia na pasadu pieršaha mera Vialikaha Mančestera. U Viestminstery heta vyhladała jak krok nazad. Ale sam Biornem śćviardžaŭ, što budučynia brytanskaj palityki zaležyć nie tolki ad Łondana, a ad taho, ci atrymajuć rehijony bolš ułady i finansavych mahčymaściaŭ.
Na vybarach jon pieramoh ź vialikim adryvam. Tak pačaŭsia novy etap jaho karjery.
Na pasadzie mera Biornem zrabiŭ hałoŭnaj temaj raźvićcio paŭnočnaj Anhlii. Jon vystupaŭ za pieradaču paŭnamoctvaŭ rehijonam, raźvićcio transpartu, budaŭnictva žylla i padtrymku biazdomnych.
Na pasadzie mera Biornem taksama inicyjavaŭ niezaležnyja rasśledavańni vypadkaŭ seksualnaj ekspłuatacyi dziaciej u Vialikim Mančestery. Ich vyniki vyjavili surjoznyja praliki ŭ pracy palicyi i sacyjalnych słužbaŭ, jakija na praciahu hadoŭ nie zaŭsiody naležnym čynam reahavali na paviedamleńni pra hvałt nad niepaŭnaletnimi.
Ale sapraŭdnuju nacyjanalnuju viadomaść jon atrymaŭ u 2020 hodzie.
Padčas pandemii COVID-19 Biornem ustupiŭ u adkryty kanflikt z kansiervatyŭnym uradam Borysa Džonsana. Jon abvinavačvaŭ centralnyja ŭłady ŭ tym, što jany niedastatkova padtrymlivajuć paŭnočnyja rehijony krainy i naviazvajuć im rašeńni biez uliku miascovych patrebaŭ.
Sprečki adbyvalisia ŭ žyvym efiry i pryciahvali ŭvahu ŭsioj krainy. Dla mnohich žycharoŭ poŭnačy Biornem staŭ simvałam supracivu łondanskamu centru. Mienavita tady za im zamacavałasia mianuška Karol Poŭnačy.
Čytajcie taksama:
Chto taki Endzi Biornem, jakoha bačać na pasadzie premjer-ministra Vialikabrytanii