U Lidzie pad ścienami zavoda raskapali krypty z sarkafahami
U Lidzie padčas ziemlanych rabot na terytoryi zavoda elektravyrabaŭ vyjavili cahlanyja krypty z sarkafahami kanca XIX stahodździa. Zavod byŭ pabudavany na miescy staroha pravasłaŭnaha niekropala, nadmahilli jakoha źniščalisia savieckimi ŭładami ažno da 1980‑ch hadoŭ.
Uskrytaja cahlanaja krypta kanca XIX stahodździa. Unutry pabudovy znachodzicca dobra zachavany mietaličny (imavierna, cynkavy) sarkafah z nakładnym kryžam na viečku. Fota: telehram-kanał Instytuta historyi NAN Biełarusi
Jak paviedamlaje Instytut historyi NAN Biełarusi, paśla vyjaŭleńnia pachavalnych kompleksaŭ budaŭničyja raboty byli spynienyja. Ciapier na miescy pracuje archieałahičnaja ekśpiedycyja, jakaja pravodzić achoŭnyja raskopki.
Śpiecyjalisty znajšli niepaškodžanyja cahlanyja krypty kanca XIX stahodździa z cełymi sarkafahami. Asablivuju kaštoŭnaść dla daśledčykaŭ ujaŭlaje identyfikavanaje pachavańnie Julijana Zdanoviča — padpałkoŭnika 172‑ha piachotnaha Lidskaha pałka. Ciapier navukoŭcy i miascovyja ŭłady vyrašajuć pytańni stabilizacyi i kansiervacyi znojdzienych pradmietaŭ, a taksama płanujuć praceduru aficyjnaha pierapachavańnia pareštkaŭ.
Jašče adna znojdzienaja cahlanaja krypta ź mietaličnym sarkafaham. Na zadnim fonie ściana pramysłovaha pradpryjemstva, dla budaŭnictva jakoha była źniesiena častka mohiłak. Fota: telehram-kanał Instytuta historyi NAN Biełarusi
Adno sa znojdzienych pachavańniaŭ. Na zdymku bačnyja reštki, vidać, zrubnaha sklepa, u jaki byŭ źmieščany sarkafah, jaki mocna sparachnieŭ ad času. Fota: telehram-kanał Instytuta historyi NAN Biełarusi
Staryja pravasłaŭnyja mohiłki kala Śviata-Hieorhijeŭskaj carkvy ŭ Lidzie sfarmiravalisia prykładna ŭ 1865 hodzie. Heta byŭ adzin z hałoŭnych haradskich niekropalaŭ, dzie chavali śviataroŭ, vajskoŭcaŭ i vybitnych dziejačaŭ. U pryvatnaści, tam byli pachavanyja zasnavalnica pieršaj lidskaj žanočaj himnazii Maryja Navickaja, biełaruskija hramadska-palityčnyja dziejačy Juljan Sakovič i Leanid Marakoŭ, a taksama ministr abarony BNR hienierał Kipryjan Kandratovič (čyje astanki ŭžo ŭ časy niezaležnaści ŭdałosia pieranieści i pierapachavać).
U saviecki čas vialikaja kolkaść nadmahillaŭ była źniesiena mienavita pad budaŭnictva Lidskaha zavoda elektravyrabaŭ. Tyja pomniki, što zastalisia, płanavałasia źniščyć paźniej dla prakładki darohi: u 1980‑ch hadach tajemna pryviezieny atrad kamsamolcaŭ z Navahrudka ŭnačy paźbivaŭ na ziamlu kamiennyja kryžy i nadmahilli. Acaleła tolki častka niekropala.
Znojdzieny ŭ čas raskopak siarebrany miedal «U pamiać vaładarańnia impieratara Alaksandra III». Na jaho advarotnym baku dobra bačnyja hady praŭleńnia impieratara «1881—1894» i kryžyk. Fota: telehram-kanał Instytuta historyi NAN Biełarusi
Nadmahilny pomnik padpałkoŭnika 172‑ha piachotnaha Lidskaha pałka Julijana Zdanoviča, jaki pamior u 1899 hodzie. Pomnik pastaŭleny «ad siabroŭ». Fota: telehram-kanał Instytuta historyi NAN Biełarusi
Da našych dzion ucaleła tolki častka pieršapačatkovych mohiłak vakoł samoj carkvy. Siońnia tam ustalavanyja miemaryjalnyja doški z proźviščami viadomych asob, čyje mahiły byli stračanyja padčas budaŭnictva zavoda.