Byłoha kalinoŭca Vieramiejčyka, jakoha vykrali z Vjetnama, pieraviali ŭ turmu

Jak stała viadoma «Našaj Nivie», palitviaźniu źmianili režym źniavoleńnia.

Pavodle infarmacyi, jakuju atrymali blizkija Vasila Vieramiejčyka, byłoha kalinoŭca pieravieźli 9 lipienia sa škłoŭskaj kałonii №17 u turmu №4, što ŭ Mahilovie. Takim čynam, dalej jon budzie znachodzicca na turemnym režymie. Na jaki pieryjad — nieviadoma.

Pra heta paviedamiła Jaŭhienija Vieramiejčyk, žonka palitviaźnia.

U červieni stała viadoma, što Vieramiejčyk maje surjoznyja prablemy sa zdaroŭjem i ŭžo byŭ dadadzieny pravaabaroncami ŭ humanitarnyja śpisy. Miarkujučy ź lekaŭ, jakija prapisali mužčynu ŭ kałonii, jon moh pieranieści infarkt mijakarda abo mieŭ vialikuju ryzyku raźvićcia takoha infarktu. 

U pačatku červienia Vieramiejčyka musili pakłaści ŭ balnicu pry minskim SIZA-1, kab zrabić jamu apieracyju na sercy, ale zamiest hetaha adpravili palitviaźnia ŭ ŠIZA, a potym i ŭ PKT (pamiaškańnie kamiernaha typu). Heta jašče bolš izaluje jaho ad nieabchodnaj dapamohi. Bolš za toje, składanyja ŭmovy ŭ PKT — toje ž ŠIZA, choć i ź nievialikimi pasłableńniami — pavialičvajuć nahruzku na jaho serca, jakoje i tak pracuje pad ryzykaj.

Z PKT, adnak, Vieramiejčyk moh by praź niejki čas viarnucca ŭ atrad u kałonii. Ale ž na turemnym režymie jon moža prabyć hady. Nieviadoma, jak tyja ŭmovy — drennaje charčavańnie, adsutnaść naležnaha śviatła i špacyraŭ, miedyčnaj dapamohi i nie tolki — mohuć adbicca na zdaroŭi palitviaźnia.

Kamientary da artykuła