Znajšli źnikłaha ŭ Katałonii biełarusa Hienadzia Smalaka

Amal miesiac vialisia pošuki źnikłaha ŭ Ispanii biełarusa Hienadzia Smalaka. Ciapier jaho znajšli i, jak paćvierdziła «Radyjo Svaboda» byłaja žonka, siabroŭka i kaleha Hienadzia Marta, špitalizavali. Padrabiaznaściaŭ taho, jak dla Hienadzia prajšli papiarednija tydni, nie raskryvajuć.

Hienadź Smalak 

9 lipienia stała viadoma, što Smalaka bačyli 6 lipienia pad Barsiełonaj. Marta tady padzialiłasia z «Radyjo Svaboda» asnoŭnaj viersijaj jaho źniknieńnia — mužčyna pierastaŭ prymać nieabchodnyja jamu tabletki, nie razumieje, dzie jon znachodzicca i, imavierna, zhubiŭsia padčas špacyru.

Hienadzia ŭ toj dzień bačyli kala jahonaha raniejšaha miesca žycharstva. Jon chadziŭ pa vulicach, ale ŭ pahoršanym psichičnym stanie, nie ŭśviedamlajučy, što adbyvajecca. Apošni miesiac, sa słoŭ siabroŭki, Smalak byŭ u kiepskim emacyjanalnym stanie, ni z kim nie kantaktavaŭ, amal nie razmaŭlaŭ z susiedziami, z pakoju i z domu amal nie vychodziŭ, «jeŭ, spaŭ, kuryŭ cyharetki». Padobnaja situacyja ŭžo zdarałasia sioleta ŭviesnu, ale tady Hienadź nie sychodziŭ z domu. 

Padać zajavu na źniknieńnie biełarusa ŭ katałonskuju palicyju było składana i ŭdałosia nie ź pieršaha razu, bo takija zajavy prymajuć tolki ad rodnych. U Smalaka ž kreŭnych u Ispanii niama, i pakul jany nie mohuć zrabić vizy i pryjechać. U palicyi prapanavali, kab rodnyja padali zajavu ab źniknieńni čałavieka ŭ biełaruskuju milicyju — tady b kalehi šukali jaho ŭ miežach mižnarodnaj supracy. Adnak blizkija miarkujuć, što heta kiepski varyjant, bo Smalaku ŭ Biełarusi pahražaje palityčny pieraśled za jahonuju hramadskuju i žurnalisckuju dziejnaść.

Hienadziu Smalaku 36 hadoŭ. U Biełarusi jon dapamahaŭ biazdomnym adnaŭlać dakumienty, pierasialacca ŭ vioski, zajmaŭsia prajektam «Ježa zamiest bombaŭ», dzie vałanciory karmili biazdomnych. Taksama Smalak pracavaŭ sanitaram u psichanieŭrałahičnym internacie №3 u Minsku. Dadatkova tam ža vałancioryŭ, ładziŭ muzyčnyja vystupy dla žycharoŭ internata, pravodziŭ art-terapiju.

Jak sam Hienadź raniej raskazvaŭ vydańniu Most, jon ukaraniaŭ toje, čaho raniej va ŭstanovie nie było: vychady ŭ horad, ekskursii, svabodny dostup da vady, televizary ŭ pałatach, mahčymaść dla vałancioraŭ naviedvać hetych ludziej. Kali, ź jahonych słoŭ, «ludzi pačali ažyvać», novy načalnik internata skasavaŭ navacyi, a Smalak zvolniŭsia sa skandałam.

Paśla adjezdu ź Biełarusi Hienadź žyŭ va Ukrainie, Polščy, Hiermanii, Ispanii. Za miažoj jon pracavaŭ žurnalistam dla roznych vydańniaŭ, u tym liku zajmaŭsia miedyjnym prajektam Not today, not yesterday, not tomorrow.

Kamientary da artykuła