Try aŭtamabilnyja brendy z najhoršymi kiroŭcami: ci jość vašaja mašyna ŭ śpisie?
Kali vy kali-niebudź žartavali, što možacie paznać kankretnuju marku mašyny pa kiepskim kiroŭcy za rulom, to danyja strachavych kampanij hatovyja heta paćvierdzić. Daśledavańnie partała LendingTree praanalizavała statystyku 30 papularnych aŭtamabilnych brendaŭ i padličyła kolkaść incydentaŭ u ZŠA (avaryj, vypadkaŭ kiravańnia ŭ pjanym vyhladzie, štrafaŭ za chutkaść i inšych parušeńniaŭ) na 1 000 kiroŭcaŭ za pieryjad z 1 studzienia pa 16 śniežnia 2025 hoda.
TOP-3 brendaŭ pavodle kolkaści parušeńniaŭ
Vyniki akazalisia davoli krasamoŭnymi: trojku antylidaraŭ uznačalili BMW, Tesla i Ram.
BMW — 44,9 incydentaŭ na 1 000 kiroŭcaŭ (abo 4,49%). Kiroŭcy hetaj niamieckaj marki demanstrujuć najvyšejšy ŭzrovień avaryjnaści i parušeńniaŭ u ZŠA.
Ram — 44,7 incydentaŭ na 1 000 kiroŭcaŭ (4,47%). Uładalniki mahutnych pikapaŭ iduć praktyčna ŭ nahu ź lidaram rejtynhu.
Tesla — 42,8 incydentaŭ na 1 000 kiroŭcaŭ (4,28%). Elektrakary, jakija ŭznačalvali hety śpis letaś, sioleta spynilisia na trecim miescy.
Dla paraŭnańnia, u inšych papularnych marak (takich jak Volkswagen, Mazda, Lexus, Infiniti, Hyundai i Toyota) hety pakazčyk značna nižejšy i vahajecca ŭ miežach ad 20 da 30 incydentaŭ.
Avaryi i ałkahol: u kaho jakija prablemy?
DTP
Tut pieršaje miesca zajmaje Tesla — ad 26 da 27 avaryj na 1 000 kiroŭcaŭ. Adzinymi brendami, jakija taksama pierasiahnuli adznaku ŭ 20 avaryj na tysiaču, stali Ram i Subaru.
Kiravańnie ŭ stanie apjanieńnia
Najvyšejšy ŭzrovień pjanych kiroŭcaŭ zafiksavany ŭ BMW (bolš za 3 vypadki na 1 000 kiroŭcaŭ), što amal udvaja bolš, čym u brenda Ram, jaki idzie śledam.
Čamu mienavita hetyja marki?
Daśledčyki vyłučajuć niekalki hipotez, čamu mienavita hetyja mašyny čaściej traplajuć u zvodki. Šparkija elektramabili ź imhniennym razhonam (Tesla), mahutnyja ruchaviki (BMW) i ciažkija pikapy (Ram) sami pa sabie mohuć padšturchoŭvać da bolš ahresiŭnaj jazdy.
Akramia taho, BMW i Ram majuć ahresiŭny dyzajn. Mahčyma, i heta pryciahvaje kiroŭcaŭ, schilnych vypraboŭvać miežy dazvolenaha, čaściej ryzykavać na darozie.